Filippində Quran hifzi yarışları başa çatıb

300 yarışmacının qatıldığı və üç kateqoriya üzrə təşkil olunan yarış qaliblərin mükafatlandırılması ilə yekunlaşıb.

Eliminasiya mərhələsində 300 nəfər iştirak edib və 21 iştirakçı finala yüksəlib.
Final mərhələsində müsabiqənin üç nominasiyası üzrə 9 nəfər birinci yerə layiq görülüb.
Filippin milli Quran hifzi müsabiqəsi bu ölkənin Dini İşlər Şurası tərəfindən Səudiyyə Ərəbistanının Dini İşlər, Dəvət və İrşad Nazirliyi ilə birgə təşkil olunub.
Mükafat mərasimində Filippin Dini İşlər Şurasının direktoru, Filippin Quran Hafizləri Dərnəyinin prezidenti və müsəlman icmasının tanınmış şəxsləri iştirak ediblər. Mərasimdə Səudiyyə Ərəbistanının Filippindəki səfiri və bu ölkənin Maniladakı səfirliyinin dini attaşesi də iştirak edib.
Səudiyyə Ərəbistanı səfiri çıxışında Filippində Quran hifzi yarışının dəstəklənməsinin Quran xidmətinə uyğun olaraq, həmçinin Qurani-Kərimin təlimlərini yeni nəslə tanıtmaq məqsədilə həyata keçirildiyini bildirib.
Mərasimin sonunda qaliblərə mükafatlar, münsiflər heyətinin üzvlərinə isə xatirə lövhəsi təqdim olunub.

iqna.ir