Qayınata və qayınana da ata-ana hökmünü daşıyırmı?

İslam qanunlarına görə, valideynin övlad üzərində olan haqqı böyükdür. Hətta valideynin övlad üzərindəki haqqını Allahın haqqından sonra birinci dərəcəli hesab edirlər. Quran ayəsinə görə, övlad valideynin sözünə həmişə qulaq asmalı, onunla kobud davranmamalı, hətta “uf” da deməməlidir. Yalnız valideyn öz övladını Allahın yolundan döndərməyə çalışsa və günah etməyə çağırsa, bu halda ona itaət etməmək olar. Lakin hər bir halda valideynin könlünü qırmamaq, etirazı da mülayim şəkildə bildirmək lazımdır. Qayınata və qayınana şəriət baxımından valideyn hökmündə deyillər və övladın valideyn qarşısında daşıdığı vəzifələr onlara şamil olmur. Lakin unutmaq olmaz ki, qayınata və qayınana insanın özünün də olmasa, həyat yoldaşının valideynidir, ailənin ağsaqqalıdır. Buna görə də həm qadın, həm də kişi öz qaynata-qaynanası ilə mümkün dərəcədə sayğı ilə davranmalıdır. Ağsaqqal və ağbirçəyə hörmət dinimizin əsas əxlaq qaydalarından biridir. Ailədə hər bir problemi anlaşma ilə, mehribanlılqa, kobudluğa yol vermədən yoluna qoymaq lazımdır. Bu, həm ailə üzvlərinin mehriban olmasına, həm ailənin möhkəmliyinə, həm də övladın tərbiyəsinə müsbət təsir göstərər.

 

islam.az