Həzrət Mühəmməd Peyğəmbər (s) həqiqətənmi yazıb-oxumağı bacarmırdı?

Həzrət Mühəmməd Peyğəmbərin (s) məşhur ləqəblərindən biri “ümmi”dir. Bu sözə fərqli mənalar verilmişdir, həmin mənalardan biri də anadangəlmə yazıb-oxumayan şəxs deməkdir. Həqiqətən, Peyğəmbər bütün həyatı boyunca yazıb-oxumamışdır, heç kim onu bu məşğuliyyət zamanı görməmişdir. Lakin o həzrətin yazıb-oxumağı bacarıb-bacarmaması barədə tədqiqatçıların fikirləri fərqlidir. Bəzilərinin fikrincə, o, həqiqətən bu bacarıqdan məhrum olmuşdur, bu üzdən ona gələn vəhyləri bəzi səhabələrə diqtə edir, onlar ayələri yazıya alırdılar. Bəzi tədqiqaçılar isə demişlər ki, Peyğəmbər hər cür nöqsandan uzaq olduğu üçün yazıb-oxumağı da bacarmışdır, lakin bunu Allahın əmri ilə qəsdən üzə çıxarmamışdır. Səbəblərdən biri bu ola bilər ki, o həzrətin oxuya bildiyini görənlər Quranın Allah tərəfindən göndərilmiş vəhy deyil, Peyğəmbərin oxuduğu kitablardan əxz etdiyi biliklərdən ibarət olduğunu iddia edərdilər. Diqqət yetirilməli məsələ budur ki, Həzrət Məhəmməd Peyğəmbərin (s) yazıb-oxumağa ehtiyacı yox idi; çünki nəinki özünə, hətta bütün müsəlmanlara lazım olan məlumatları Allah ona vəhy vasitəsilə öyrədirdi. Allahın Rəsulu yazıb-oxumasa da, bütün yazıb-oxuyanlardan daha savadlı idi. Hər kəs bilmədiyini ondan soruşur və ən yüksək səviyyədə qənaətbəxş cavab alırdı.

 

islam.az