Həzrət Mühəmməd Peyğəmbər (s) niyə bir məscidin sökülməsini əmr etmişdi?

Həzrət Müəhmməd Peyğəmbər (s) Məkkədən Mədinəyə hicrət etdikdən sonra Mədinədə bir dəstə insan İslamı üzdə qəbul edib özünü müsəlman kimi göstərirdi, qəlbində isə kafir qalmışdl. Onlar gün-gündən qüvvətlənən müsəlmanları məhv etmək üçün açıqda mübarizə apara bilmədikləri üçün gizli planlar çəkib təxribat törədirdilər. Hicrətin 9-cu ilində (miladi 630-cu il) Peyğəmbər Təbuk yürüşünə çıxmazdan əvvəl münafiqlər Mədinənin girəcəyindəki Qüba məntəqəsində məscid tikmək üçün ondan icazə istədilər. Onların məqsədi İslam pərdəsi altında toplaşa bilmək üçün qərargah yaratmaq idi. Peyğəmbər cavabı Təbuk səfərindən qayıdandan sonra verəcəyini söylədi, lakin münafiqlər bu sözə qulaq asmayıb məscidi tikdilər. Peyğəmbər Təbuk səfərindən qayıtdıqdan sonra ondan xahiş etdilər ki, yeni məscidi ziyarət edib orada namaz qılsın. Bu zaman Peyğəmbərə nazil olan ayələrdə həmin bina “zirar məscidi” yəni “zərərli məscid” adlandırıldı (Tövbə, 107-108). Peyğəmbər dərhal müsəlmanlara əmr verdi ki, oranı uçurub yerlə-yeksan etsinlər. Müsəlmanlar zirar məscidini dağıdıb yandırdılar.

 

islam.az