Bəzi hədislərdə adları çəkilmiş dörd mömin qadından biri olan Asiya kimdir?

Dini mənbələrdə rast gəlinən bir hədisdə Həzrət Mühəmməd Peyğəmbər (s) buyurmuşdur ki, cənnət qadınlarının ən üstünü bu dörd nəfərdir: Peyğəmbərin həyat yoldaşı Xədicə xanım, Peyğəmbərin qızı Həzrət Fatimə (ə), İsa Peyğəmnərin (ə) anası Həzrət Məryəm və fironun arvadı Asiya. Asiya (Asiyə) Müzahimin qızı və Misir fironunun həyat yoldaşı idi. O, körpə Musanı (ə) sudan tapıb xilas etmiş və böyütmüşdü. Sonralar Həzrət Musa (ə) Allah tərəfindən peyğəmbər təyin edildi, fironu haqq yola çağırmağa vəzifələndi. Firon onun çağırışlarına məhəl qoymadı və Allahın varlığını qəbul etmədi, özünü tanrı saymaqda davam etdi. Onun ətrafındakıların az bir qismi Musanın (ə) dediklərinə iman gətirdi. Musa (ə) ilə mübahisə edib məğlub olan sehrbazların bir qismi və fironun öz arvadı Asiya da bunlardan idi. Firon öz arvadını imandan döndərib öz dediklərini qəbul etməyə məcbur etmək üçün işgəncələrə məruz qoydu. Lakin Asiya Allahın yolundan dönmədi, fironun tanrılıq iddiasını rədd etdi və işgəncələr altında şəhid oldu. Buna görə o, İslamda dörd ən üstün qadından biri sayılır.

 

islam.az