Allahı yad etmək və psixoloji sağlamlıq

28 Yanvar 2024 - 19:12

Qurani-Kərim buyurur: “Onlar o kəslərdir ki, iman gətirmiş və qəlbləri Allahı zikr etməklə aram tapmışdır. Bilin ki, qəlblər yalnız Allahı zikr etməklə aram tapar!” (Rəd, 28).

İslam nöqteyi-nəzərindən insanın ən yüksək və ən dəyərli məqamı o zaman yaranır ki, insan Allahı zikr edib ruhu ona yönəlsin ki, onun qəlbində Allahın nuru zühur etsin, ruhi və psixoloji aramlıq tapsın. Qurani-Kərim buyurur: “Məgər Allahın köksünü (qəlbini) islam üçün açmaqla Rəbbindən nur üzərində olan kəs (qəlbi möhürlənmiş kimsə kimi ola bilərmi)?! [Və ya: Məgər Allahın köksünü (qəlbini) islam üçün açdığı kəs Rəbbindən bir nur üzərində deyilmi?!] Elə isə vay qəlbləri Allahın zikrinə (Qurana) qarşı sərt olanların halına! Onlar (haqq yoldan) açıq-aydın azmışlar” (Zumər, 22).

Bu səbəbdən də insanın başına müsibət gəldiyi zaman ona tövsiyə olunur ki, desin: “İnna lillah və inna iləyhi raciun”: Biz Allaha məxsusuq və Ona da qayıdacağıq!” (Bəqərə, 156). Odur ki, insanın sağlamlığına, ruhi xəstəliklərdən sağalmasına, daxili rahatlığa və əminliyə nail olmaq yolunda atılacaq ən mühüm addımlardan biri də Allahı zikr etməkdir.

Həmçinin qəfləti müalicə etmək və insan istedadlarını çiçəkləndirmək istiqamətində hərəkət etmək yollarından biri də “Zikr etmək”dir. Ona görə də həyatda aramlıq yaratmaq üçün dua edib Uca Allaha sığınmalıyıq. Bu dua qəbul olub-olmamasından asılı olmayaraq insanın ruhunda aramlıq yaradır; çünki dua etmək Allahı zikr etməyin nümunələrindən biridir və Allahı zikr etmək mütləq aramlıq gətirir. Necə ki, Uca Allah Əyyub peyğəmbərin (ə) əhvalatı haqqında buyurur: “(Ya Rəsulum!) Əyyubu da (yada sal)! Bir zaman o, Rəbbinə yalvarıb dua edərək belə demişdi: “Mənə bəla üz verdi (Sənə pənah gətirdim). Sən rəhmlilər rəhmlisisən! Biz (Əyyubun) duasını qəbul buyurduq, onu düçar olduğu bəladan (xəstəlikdən və ailəsinə üz vermiş müsibətdən) qurtardıq. Dərgahımızdan (Əyyuba) bir rəhmət və (Allaha) ibadət edənlərə ibrət dərsi (öyüd-nəsihət) olsun deyə, (həlak olmuş) övladlarını qaytarıb ona verdik, üstəlik bir o qədər də əlavə etdik”  (Ənbiya, 83-84).

 

iqna.ir