Balkan ölkələrinin Quran yarışlarının final mərhələsi başlayıb

12 Noyabr 2023 - 22:23

Bu yarışlar Səudiyyə Ərəbistanının İslam İşləri, Dəvət və İrşad Nazirliyi adından Səudiyyə Ərəbistanının Bosniya və Herseqovinadakı səfirliyinin dini attaşesi tərəfindən təşkil olunur.

Adıçəkilən yarışlarda Balkan regionunda yerləşən 14 ölkədən oğlanlar və qızlar olmaqla iki bölmədə 96 iştirakçı iştirak edir.

Yarışların final mərhələsinin iştirakçıları 1766 Quran hafizinin iştirakı ilə keçirilən ilkin mərhələ yarışlarından sonra seçilib və onlar dörd fənn üzrə yarışacaqlar: Quranı bütünlüklə əzbərləmək, 10 cüzü əzbərləmək, 5 cüzü əzbərləmək və iki cüzü əzbərləmək.

Bu yarışlar gənc nəslin Quranla tanış olması, vəhy kəlamını sevən nəsil yetişdirilməsi, gənc nəslin dini, elmi və əxlaqi yönünün gücləndirilməsi, eləcə də islami kimliyi qorumaq üçün gəncləri dini elmləri öyrənməyə və Quranı əzbərləməyə təşviq etmək üçün keçirilir.

Qeyd edək ki, Balkan yarımadasının müsəlmanları, hakim hökumətlər tərəfindən illərlə dini kimliklərinin aradan aparılmasından sonra, son bir neçə onillikdə yenidən bu kimliyə geniş şəkildə diqqət yetirmiş və onu dirçəltmək üçün çoxlu səylər göstərmişlər. İslam elmlərini və tarixi dini kimliyin əsaslarını öyrənməklə yanaşı, Quranı öyrənmək və vəhy kəlmələrini əzbərləmək də bu səylərin mühüm tərkib hissəsi olmuşdur.

Xatırladaq ki, Balkan yarımadası kimi də tanınan Balkanlar Avropanın cənubundakı ən şərq və ən böyük yarımadadır. Balkanlar adətən Albaniya, Bosniya və Herseqovina, Bolqarıstan, Xorvatiya, Kosovo, Monteneqro, Şimali Makedoniya, Rumıniya, Serbiya və Sloveniya ölkələrindən ibarətdir ki, bunların hamısı və ya bir hissəsi bu yarımadada yerləşir.

 

iqna.ir