Ölüm anında insan ruhunu kim alır?

22 Oktyabr 2023 - 20:11

Qurani-kərim bir yerdə ruhun alınmasını Allaha nisbət verir: “Allah (əcəli çatan kimsələrin) canlarını (ruhlarını) onlar öldüyü zaman, ölməyənlərin (hələ əcəli çatmayanların) canlarını isə yuxuda alar (çünki yuxu da ölüm kimi bir şeydir, yuxu zamanı ruh bədəni tərk edər)”. (Zümər, 42).

Başqa yerdə ruhun alınmasının ölüm mələyinin işi olduğu qeyd edilir: “(Ya Rəsulum!) De: “Sizə müvəkkil olan ölüm mələyi (Əzrail) canınızı alacaqdır. Sonra da (qiyamət günü) Rəbbinizin hüzuruna qaytarılacaqsınız!” (Səcdə, 11).

Həmçinin başqa yerdə bu işi mələklərə nisbət verir və buyurur: “Nəhayət, birinizin əcəli gəlib çatdıqda onun canını (göndərdiyimiz) mələklər alar. Onlar (öz vəzifələrində) heç bir əyərəskikliyə yol verməzlər” (Ənam, 61).

Bu üç ayə bir-biri ilə ziddiyyət təşkil etmir, çünki ölüm mələyi Allah tərəfindən təyin edilib və “vukkilə bikum” cümləsi ilə ona işarə olunur. Eynilə mələklər də Allahın elçiləridir və Quranda “Onun elçisi” kimi qeyd olunur.

Ona görə də canları alan Allahdır. Ölüm mələyi və digər mələklər Allah tərəfindən bu məqsədlə təyin edilmişdir. İmam Sadiq (ə) buyurur: "Mələkul-məvtun mələklərdən ibarət köməkçiləri vardır. Onlar dünyanın hər yerində can alır və onları Əzrailə təhvil verirlər, o da hamısını Allaha təqdim edir".

İnsanın canının alınmasını Allaha, Əzrailə və mələklərə aid etmək düzgündür. Bu, yazmağı həm insana, həm əllərə, həm də qələmə aid etmək kimidir. Çünki qələm ələ, əl də insana aiddir.

Peyğəmbərimiz (s) merac gecəsi ölüm mələkindən soruşur: "Necə olur ki, şərq və qərbdə eyni anda görünürsən?". Ölüm mələyi dedi: Mənim üçün bütün dünya sənin ovucundakı sikkə kimidir".

* Möhsin Qəraəti tərəfindən yazılmış "İslamın əqidə prinsipləri (Məad)" kitabından götürülmüşdür.

 

iqna.ir