Əvvəlki səmavi dinlərdə zəkat

16 Oktyabr 2023 - 15:16

Zəkat və namaz bütün səmavi dinlərdə gəlib.

Həzrət İsa (ə) beşikdə ikən danışdı və dedi: “Allah mənə namaz qılmağı və zəkat verməyi əmr etmişdir” (Məryəm, 31).

Həzrət Musa (ə) bəni-israilə xitab edərək dedi: “Namaz qılın və zəkat verin” (Bəqərə, 43).

Quranda Həzrət İsmayıl (ə) haqqında buyurulur: “O, ailəsinə namaz qılmağı və zəkat verməyi əmr etdi” (Məryəm, 55)

Həmçinin bütün peyğəmbərlər haqqında buyurulur:

“Biz onları əmrimizlə (insanlara) doğru yolu göstərən imamlar (rəhbərlər) etdik. Biz onlara xeyirli işlər görməyi, namaz qılmağı və zəkat verməyi vəhy etdik. Onlar yalnız Bizə ibadət edirdilər” (Ənbiya, 73).

Quranda buyurulur: “Halbuki onlara əmr edilmişdi ki, Allaha -dini yalnız Ona xas edərək, batildən haqqa (islama) dönərək-ibadət etsinlər, namaz qılıb zəkat versinlər. Doğru-düzgün din budur!” (Bəyyinə, 5) Bu ayəyəyə əsasən, zəkat bütün səmavi dinlərdə namazla birlikdə və bərabər olmuşdur.

Mərhum Əllamə Təbatəbayi zəkatla bağlı bir bəhsdə deyib: İslamın gətirdiyi tam formada ictimai qanunlar keçmişdə olmasa da, onun mənşəyi İslamın təşəbbüsü deyildi. Çünki insan fitrəti bunu az da olsa, dərk edirdi. Buna görə də İslamdan əvvəlki dini ayinlərdə və qədim Roma qanunlarında cəmiyyətin idarəçiliyi ilə bağlı bəzi şeyləri görə bilərik. Demək olar ki, heç bir dövrdə elə bir xalq olmayıb ki, cəmiyyətin idarə olunması üçün orada mali hüquqlar olmasın. Çünki cəmiyyətin yüksəlişində, böyüməsində nə olursa olsun, maliyyə xərcləri lazım idi.

 

iqna.ir