Başqa dinin ardıcılı İslamı qəbul edirsə, əvvəlki illərin namaz və oruclarını qəza etməlidimi?

İslam dinində namaz ən mühüm ibadətlərdən biri və birincisidir. Hətta bəzi hədislərə görə, qiyamətdə namazı qəbul edilməyən şəxsin digər ibadətlərinin qəbul ediləcəyi şübhə altındadır. Namazı vaxtında qılmayan şəxs onu mütləq qəza etməlidir (istisna yalnız paklıq halı pozulmuş qadınlara aiddir). Əgər bir şəxs yetkinlik yaşına çatdıqdan sonra hər hansı səbəb üzündən namaz qılmamışsa, xeyli sonra namaza başlamışsa, yetkinlik yaşına çatdığı dövrdən etibarən öhdəsinə düşən namazların qəzasını mütləq qılmalıdır. Hətta şəriətə görə, əgər ata və ya ana namaz qılırsa, amma boynunda qəza namazı olduğu halda vəfat edərsə, onun namazlarının qəzasını böyük oğul yerinə yetirməli və ya başqasına pulla da olsa qıldırmalıdır. Amma bu qayda başqa dindən çıxıb İslamı qəbul eymiş şəxsə şamil deyil. Çünki İslamı qəbul etməklə insanın həyatında yeni bir səhifə açılır, bundan əvvəlki səhifə isə pozulur. İslamı qəbul etməzdən əvvəl insanın etdiyi günahlar silinmiş olur. Kim başqa dindən çıxıb müsəlman olsa, bundan əvvəlki dini borcları və məsuliyyətləri ondan soruşulmaz, o biri dində olduğu zaman qılmadığı namazları qəza etməsi də ona vacib deyil.

 

islam.az