Qəza oruclarını ardıcıl şəkildə tutmaq lazımdır yoxsa fasilə ilə də tutmaq olar?

Ramazan ayının orucunu tutmaq hər kəsə (xəstə və səfərdə olanlardan başqa) vacibdir. Hətta üzürlü səbəbdən oruc tuta bilməyən adam üzürü aradan qalxdıqdan sonra orucunu qəza etməlidir. Məsələn, Ramazan ayında səfərdə olan şəxs vətəninə qayıtdıqdan sonra, xəstə sağaldıqdan sonra, heyz olmuş qadın pak olduqdan sonra oruc tutmadığı günlərin qəzasını yerinə yetirməlidir. Adı çəkilən hallarda qəza orucu tutan adamın ardıcıllığa riayət etməsi vacib deyil, yəni bir neçə gün oruc qəzası varsa, onları fasilə ilə də tuta bilər. Amma əgər insan qəsdən Ramazan ayının orucunu pozubsa və ya üzürsüz yerə qəsdən oruc tutmayıbsa, onun boynuna kəffarə (cərimə) gəlir. Kəffarənin indiki dövrdə 2 mümkün yolu var: ya hər günün əvəzində 60 nəfər fəqiri yeməklə doyuzdurmaq ya da hər günün əvəzində 60 gün oruc tutmaq. Əgər insan kəffarəni oruc tutmaqla ödəyirsə, bu halda 60 günün ən azı 31 gününün orucunu ardıcıl olaraq fasiləsiz tutmalıdır. 31 gün fasiləsiz oruc tutduqdan sonra qalan 29 günün orucunu fasilə ilə də tuta bilər.
 

islam.az