Kişi ilə qadının (oğlanla qızın) əl verib görüşməsi düzgündürmü?

İslam dini qarşı cinslərin ünsiyyəti zamanı ciddi qaydalara riayət olunmasını təbliğ edir. Bir-birinə məhrəm olmayan şəxslər mütləq bəzi məhdudiyyətləri qorumalıdırlar. Naməhrəm qadınla kişinin nəinki bədən təması, hətta qadının sifətindən və biləkdən aşağı əllərindən başqa hər hansı bədən üzvünü naməhrəm kişiyə göstərməsi belə, haram sayılır. Qadınla kişi (oğlanla qız) şəriətə əsasən məhrəm deyillərsə, bir-birinin bədəninə toxuna bilməzlər. Naməhrəmlərin əl təması da qadağandır, yalnız zərurət halında əlcəklə və örtük altından təmas etməyə icazə verilə bilər. Məsumlarımız hətta insanlardan beyət alan zaman kişilərlə əl verdikləri halda, qadınlarla birbaşa təmasdan çəkinmişlər. Beyət mərasimi zamanı böyük bir qabı su ilə doldururdular, Peyğəmbər və ya İmam əlini qabın içinə salırdı. Beyət edən qadın da əlini həmin qabın içinə salmaqla beyət mərasimi həyata keçirilirdi. İmam Əlinin (ə) hətta cavan qadınlara salam verməkdən çəkinməsi barədə rəvayətlər mövcuddur.

 

islam.az