Quranın təhrif olunması barədəki hədisləri necə dəyərləndirməliyik?

İslam dinində düzgün və üstün olan fikir budur ki, Qurani-Kərim təhrif olunmamış və nazil olduğu şəkildə günümüzə kimi gəlib-çatmışdır. Quranın öz ayələri, eləcə də onlarla hədis bunu sübut edir ki, müqəddəs kitabda bircə hərf və nöqtə də dəyişməyib. Bununla belə, Quranın guya təhrif edilməsi, bəzi ayələrin Qurandan çıxarılması barədə hədislər mövcuddur. Bu cür hədislərə həm əhli-sünnə, həm də şiə mənbələrində rast gəlmək mümkündür. Hər iki məzhəbin böyük alimləri bu cür hədisləri etibarsız saymış, onlara inanmamağı tövsiyə etmişlər. Quran təhrifinin sübutu kimi anlaşılan bəzi hədislər isə çox zaman düzgün şərh edilmir. Məsələn, şiə rəvayətlərinə görə İmam Əli (ə) Peyğəmbərin vəfatından sonra onu vəsiyyətinə əsasən Quran ayələrini toplayıb kitab halına salmışdı. Hədislərdə həmin nüsxə “Əlinin müshəfi” adlandırılıb. Lakin Əlinin (ə) müshəfi möhtəva baxımından müasir Qurandan fərqlənmirdi, orada heç bir əlavə və ya ixtisar yox idi. Saəcə olaraq İmam Əli (ə) ayələri nazil olduqları ardıcıllıqla düzmüş, səhifələrin kənarında isə ayələrə şərhlər yazmışdı. Həmin Quran nüsxəsi irsən imamlara ötürülmüşdür. Bəzi kitablarda şiələrin özlərinin ayrıca Quranı olması, Əlinin (ə) tərtib etdiyi fərqli Quranı oxumaları barədə yazılanlar həqiqətdən uzaqdır və iftiradır.

 

islam.az