Bir insanın əlinə çoxlu miqdarda super yapışqan dağılıb və quruyubsa, dəstəmaz zamanı nə etməlidir?

Şəriətə görə qüsl və dəstəmaz zamanı suyun bədəni islatmasına heç nə mane olmamalıdır. Əgər su ilə islanması lazım olan bədən üzvü arasında maneə varsa, həmin maneə mütləq aradan qaldırılmalı, bundan sonra qüsl və dəstəmaz alınmalıdır. Bunu etmədən alınan qüsl və dəstəmaz düzgün sayılmır, qılınan namaz da qəbul edilmir. İnsanın əlinə çətin təmizlənən yapışqan və s. yapışıbsa, hər mümkün vasitə ilə onu təmizləməyə çalışmalıdır. Bu zaman dəriyə ziyan yetirməyən kimyəvi vasitələrdən, fiziki təsir yollarından (qaşımaq, qoparmaq və s.) istifadə etmək olar. Demək olar elə bir yapışqan yoxdur ki, diqqət və səbirlə təmizlənməsin. Amma hər hansı səbəb üzündən, o cümlədən vaxtın azlığına görə yapışqanı təmizləmək heç cür mümkün olmasa, namaz qılmazdan qabaq ehtiyata görə həm dəstəmaz almaq, həm də təyəmmüm etmək məsləhətdir. Bu yolla bir müddət ibadətləri yerinə yetirmək olar. İmkan düşdükcə yenə yapışqanı təmizləməyə çalışmaq lazımdır. Müəyyən vaxt keçdikcə həmin maneə özü də sürtülüb aradan gedəcək.

 

islam.az