Quranda İsa Məsihin (ə) möcüzələri

27 Iyun 2023 - 13:05

Həzrət İsanın (ə) çoxlu möcüzələri olmuşdur. Bu möcüzələr həm peyğəmbərlik əlaməti, həm də Allahla əlaqyə işarə idi ki, insanlar onları görərək Allaha inansınlar.

İsa Məsihin (ə) ilk möcüzəsi onun doğulmasıdır. Qurani-Kərimə görə, Məryəm (s) evlənmədən və kişi ilə münasibət qurmadan Allahın izni ilə hamilə qaldı. Quranda deyildiyinə görə, İsa Məsihin (ə) bu şəkildə dünyaya gəlməsi insanlar üçün bir əlamət və Allah tərəfindən bir rəhmətdir (Məryəm, 21).

Həzrət İsanın (ə) ikinci möcüzəsi o, doğulduqdan sonra və beşikdə ikən danışaraq: “Mənə kitab verən və məni peyğəmbər edən Allahın quluyam” deməsidir (Məryəm, 30).

Bu iki möcüzədən başqa, İsa Məsih üçün peyğəmbərlik dövrünə aid olan başqa möcüzələr də təqdim edilmişdir. Məsələn, onun dörd möcüzəsi “Ali-İmran” surəsinin 49-cu ayəsində qeyd olunub; Palçıqdan quşu diriltmək, anadangəlmə korlara və kor olana şəfa vermək, ölüləri diriltmək və insanların gizli xəbərlərini söyləmək: "Mən, həqiqətən, Rəbbinizdən sizə möcüzə gətirmişəm. Sizin üçün palçıqdan quşa bənzər bir surət düzəldib ona üfürərəm, o da Allahın iznilə quş olar. Anadangəlmə korları, cüzam xəstəliyinə tutulanları sağaldar və Allahın iznilə ölüləri dirildərəm. Mən evlərinizdə yediyiniz və yığıb saxladığınız şeyləri də sizə xəbər verərəm. Əgər möminsinizsə, bunda (peyğəmbər olduğuma) bir dəlil vardır".

Həzrət İsanın (ə) başqa bir möcüzəsi də həvarilərin xahişi ilə səma süfrəsinin enməsidir: "Onu da xatırla ki, o zaman həvarilər demişdilər: “Ya Məryəm oğlu İsa! Rəbbin bizə göydən (yeməklə dolu) bir süfrə göndərə bilərmi? O (İsa): “Əgər möminsinizsə, Allahdan qorxun!” -demişdi. (Həvarilər) demişdilər: “Biz istəyirik ki, ondan yeyək, ürəklərimiz sakit olsun, sənin bizə doğru dediyini bilək və ona (süfrənin göydən enməsi möcüzəsini görməklə sənin peyğəmbərliyinin həqiqiliyinə) şahidlik edənlərdən olaq. Məryəm oğlu İsa dedi: “Ya Allah, ey bizim Rəbbimiz! Bizə göydən bir süfrə nazil et ki, o bizim həm birincimiz, həm də axırıncımız (həm bizim, həm də bizdən sonra gələnlər) üçün bir bayram və Səndən (Sənin qüdrətindən) bir möcüzə olsun. Bizə ruzi ver ki, Sən ruzi verənlərin ən yaxşısısan!" (Maidə 112-114).

 

iqna.ir