“Qızıl zəncir hədisi” nədir?

Dini mənbələrdə “silsilət əl-zəhəb”, yəni qızıl zəncir hədisi kimi xatırlanan rəvayət səkkizinci İmam Rzadan (ə) nəql olunur. İmam Rza (ə) xəlifə Məmunun əmri ilə Mədinədən Xorasana gətirilərkən Nişapur şəhərində on minlərlə adam karvanın pişvazına çıxır. Hətta İmamın dilindən çıxacaq hədisləri yazıya almaq üçün gələn katiblərin sayı 24 min nəfər imiş. İmam izdihamın xahişi ilə kəcavənin pərdəsini qaldırıb bu hədisi söyləyir. Hədisin sənədində İmam buyurur ki, o öz atası İmam Kazimdən (ə) eşidib, o da atası İmam Sadiqdən (ə), o öz atası İmam Baqirdən (ə), o öz atası İmam Səccaddan (ə), o öz atası İmam Hüseyndən (ə), o öz atası Əmirəlmöminin Əli ibn Əbutalibdən (ə), o – Allahın Rəsulundan, o – Cəbraildən, o isə Allah-Taaladan rəvayət edib: “La ilahə illəllah kəlməsi mənim qalamdır. Hər kim bu qalaya daxil olsa, əzabımdan amanda qalar”. İmamın sözləri bitib karvan yola düşməyə hazırlaşanda o həzrət əlavə edir: “Bunun şərtləri var və mən həmin şərtlərdənəm”. Göründüyü kimi yuxarıdakı rəvayət hədisi-qüdsi təbəqəsinə aiddir. Hədisin rəvayət zəncirində İmam Rzaya (ə) kimi bütün imamların, peyğəmbərin, mələyin adı xatırlandığı və Allah-Taaladan rəvayət edildiyi üçün onu “qızıl zəncir hədisi” adlandırırlar.

 

islam.az