Məsum rəhbərlərin nəzərində ölüm

02 May 2023 - 20:10

İslam Peyğəmbəri (s) buyurur: Möminlərin dünyadan çıxışı uşağın ana bətnindən çıxması kimidir ki, o, qaranlıqdan, sıxıntılardan və təzyiqlərdən işıqlı və böyük bir məkana daxil olur.

  İmam Həsəndən (ə) soruşdular ki, ölüm nədir? O həzrət buyurdu:

اَعظَم سُرورٍ یَرِدُ عَلى المُؤمن; "Möminə gələn ən gözəl sevinc ölümdür".

  İmam Hüseyn (ə) buyurur: فَما المَوت الاّ قِنطَرة "Ölüm sizi dünyanın sıxıntılarından Allahın rifahına və lütfünə aparan körpüdür". Necə ki, Allah düşmənləri üçün saraydan zindana doğru gedişdir.

  İmam Səccad (ə) buyurur:

المَوتُ للمؤمن كنَزعِ ثیابٍ وَسِخَة قُمّلَةٍ و فَكّ قُیودٍ و اغلال ثَقیلة والاستبدال باَفخَر الثیاب و اطیبها

"Möminlər üçün ölüm, çirkli paltarları çıxarıb sonra ən gözəl ətirli və qiymətli paltarları geyinib ağır zəncirlərdən azad olmaq kimidir". Daha sonra İmam sözünə belə davam edir: "Kafirlər üçün bu ölüm dəbdəbəli paltarlarını çıxarıb çirkli və pis paltarlarını geyinmək və xoş evləri tərk edib qorxunc evlərə köçmək kimidir".

  İmam Baqir (ə) buyurur:

الموتُ هو النَّوم الّذى یَاتِیكم فى كلّ لَیلةٍ الاّ اِنّه طَویلٌ مدّته...؛

"Ölüm hər gecə sənə gələn yuxu kimidir, amma müddəti uzundur". Əlbəttə, İmamın rəyi ölüm və bərzəx haqqındadır.

  İmam Sadiq (ə) buyurur:

الموتُ للمؤمن كاَطیَب رِیحٍ یَشُمّه... وللكافر كلَدغ الاَفاعى و كلَسعِ العَقارب...؛

"Mömin üçün ölmək ən gözəl qoxuları iyləmək kimidir, kafir üçün isə əqrəb və ilan sancması kimidir".

  Başqa hədislərdə oxuyuruq: "Ölüm mömin üçün dərman kimidir. Yaxud Allah adamları üçün ölmək hamama getmək kimidir, bir az çətin olsa da, paklıq, yüngüllük və sevinc vasitəsidir".

  Bu söhbəti Həzrət Peyğəmbərdən (s) bir hədislə bitirəcəyik ki, o həzrət buyurdu: اِنّ المَوتَ عِندى بِمنزلَةِ الشّربَة البارِدَةِ فى الیَوم الشدّیدِ الحَرّ؛ "Məncə, ölüm susamış adamın çox isti gündə içdiyi sərin şərbəti içməyə bənzəyir".

Möhsin Qəraəti tərəfindən yazılmış "İslamın əqidə prinsipləri; (Məad)" kitabından götürülmüşdür.

 

iqna.ir