Qədr gecəsi

29 Mart 2023 - 12:15

Qədr gecəsi bütünlüklə xeyir-bərəkət gecəsi olar, mələklər yer üzündə gəzib, Allahın müxlis bəndələrinə salam verərlər. Buna görə də Qədr gecəsi səhərə qədər oyaq qalıb, ibadət etmək müstəhəb sayılır.

Əgər bir şəxs Qədr gecəsi ibadətlə məşğul olarsa, onun bu gecədəki ibadəti min ay (təqribən 84 il) ibadətdən üstün və fəzilətli olar. Rəvayətlərdə Qədr gecəsinin fəziləti haqqında çoxlu hədislər nəql olunub. Qədr gecəsini Allah-Təala məhz Həzrət Məhəmmədin (s) dövründə onun ümməti üçün təyin edib.

Hədislərdə nəql olunur ki, o gecə şeytan möminlərə yaxın düşə bilməz. Hər kəs bu gecənin ləzzətini, mənəvi gözəlliyini hiss etmək və günahlarının bağışlanmasını istəyirsə, bu gecəni ibadətlə keçirməli, mələklərin salamına cavab verməlidirlər. Qədr gecəsi əhya saxla- maq, yəni səhərədək oyaq qalmaq savab sayılır. Həmin gecədə təkcə oyaq qalmağın özü də ibadət sayılır. Çün- ki oyaq qalmanın özü bu mübarək gecəni ilin başqa günlərindən tamamilə fərqləndirir.

Hər kim Qədr gecəsində oyaq qalıb Allaha ibadət edərsə, Allah-Təala ona min ay ibadətin savabından artıq savab yazar. Əgər bir kəs oyaq qalmaqla narahat olursa, yatmağın heç bir eybi yoxdur. Çünki onun bu gecəni oyaq qalmaq və ibadət etmək niyyəti ona bu savabı qazanmağa imkan verir. Allah bütün niyyətlərdən xəbərdardır və inşallah, bu yuxusunu onun üçün ibadət hesab edər. Çünki gecə oyaq qalıb narahat halda ibadət etmək düzgün deyil. İnsan gərək ibadəti eşq və həvəslə yerinə yetirsin.

Evlərimizdə səhərə qədər oyaq qalıb Allaha ibadət etməkdə məqsəd budur ki, Allah-Təalaya ibadət və dua edib günahlarımızın bağışlanmasını diləyək. Bu gecə Allah özü insanları dəvət edərək onların günahlarını bağışlayır.

Nəql olunur ki , hər kim qədr gecələrini əhya saxlasa , günahları göydəki ulduzların, dağların ağırlığı, dənizlərin tutumu qədər olsa belə bağışlanar.

Qədr gecəsinin fəziləti haqqında deyilir:

Günahların bağışlandığı gecədir. Həzrət Peyğəmbər (s) buyurur: “Hər kim Qədr gecəsini əhya saxlayar və mömin olar, Qiyamət gününə etiqadı olar, bütün günahları bağışlanılar”.

Ramazan ayının qəlbidir. İmam Sadiq (ə) buyurur: “Allahın kitabından istifadə olunur ki, Allah yanında ilin aylarının sayı on ikidir. Ayların ən üstünü - Ramazan ayıdır, Ramazan ayının qəlbi isə Qədr gecəsidir”. Həzrət Peyğəmbər (s) buyurur: “Qədr gecəsi - gecələrin sərvəridir”.

Min aydan daha yaxşıdır. Qurani-Kərim buyurur: “Qədr gecəsi min aydan daha xeyirlidir”. (“Qədr” 3).

Bəs nəyə görə bu gecə min aydan daha üstündür?

Nəql olunur ki, o zaman ki, Ramazan ayı yaxınlaşardı, Həzrət Peyğəmbər (s) Bilala buyurardı: “Müsəlmanları məscidə çağır”. Onlar toplaşan zaman minbərə qalxar və Allaha həmd etdikdən sonra buyurardı: “Ey insanlar! Allah Təala bu ayı sizə aid etmişdir. O, ayların seyyididir və onda elə bir gecə vardır ki, min aydan daha yaxşıdır”.

Bu gecədə edilən hər bir yaxşı əməl, başqa gecələrdə edilənlərdən daha üstündür. İmam Sadiqə (ə) sual verirlər ki, necə ola bilir ki, Qədr gecəsi min aydan üstün olur? Həzrət (ə) belə cavab verir: “Qədr gecəsindəki əməl, Qədr gecəsinin olmadığı min ayda edilən əməldən daha üstündür”.

Mələklər və ruh Allahın izni ilə yerə enərlərlər. İmam Səccad (ə) buyurur: “Allah Peyğəmbərə (s) buyurur: “Bilirənsənmi ki, Qədr gecəsi niyə min aydan daha üstündür?”. Həzrət (s) buy- urur: “Xeyr”. Allah buyurur: “Ona görə ki, bu gecədə mələklər və ruh Allahın izni ilə yerə enərlərlər”.

Quran bu gecədə nazil olmuşdur. Bəli, Qurani-Kərim bu gecədə bir dəfəyə, xülasə şəklində Peyğəmbərin (s) o nurani qəlbinə bir ruh kimi nazil olmuşdur. Lakin sonradan 23 il ərzində söz şəklində tədricən nazil olmuşdur.

Qədr gecəsi ən mübarək gecələrdən biridir və bu gecənin bərəkət və xeyirləri çoxdur. Ona görə də qarşıdan gələn Qədr gecələrinin fürsətlərini əldən verməyək və ondan bəhrələnməyə çalışaq.

Qədr gecəsinin fəziləti. Təbii ki, bu gecədə ibadət və zikr edilərək ehya saxlamaqdadır. Və ayədə buyurulduğu kimi bu gecə 1000 aydan daha üstündür. Yəni bu ayda edilən ibadətlərin, oxunan zikrlərin, verilən sədəqələrin və digər xeyir əməlləri savabı 30 000 dəfə daha artıqdır, çünki 80 ildə 30 000 gün var.

Bu gecənin insanlara gizli qalmasının hikməti və fəlsəfəsi nədir?

Təfsir alimləri bu sualın cavabında deyiblər ki, bu gecənin gizli qalmasının səbəbi odur ki, insanlar Ramazan gecələrinin hamısına əhəmiyyət versinlər. Bu mənanı aşkar etmək üçün misal olaraq deyiblər: “Necə ki, Allah öz razılığını itaətlərin içində gizlədib ki, insanlar bütün işlərdə itaətkar olsunlar. Və qəzəbini məsiyyətlər arasında gizlədib ki, insanlar bütün məsiyyətlərdən uzaq dursunlar. Həmçinin öz dostlarını insanlar arasında gizlədib ki, bütün insanlara ehtiram olunsun. Necə ki, İsmi-Əzəmi Əsmaul-Husnanın içində gizlədib ki, bütün sifətləri böyüklüklə yad edilsin. O cümlədən ölüm vaxtını gizlin saxlayıb ki, insanlar hər zaman hazır olsunlar”.