Həzrət Peyğəmbərin (s) sözlərində Ramazan ayının fəzilətləri və ədəbləri

27 Mart 2023 - 10:24

Mötəbər "Kənzul-məram fi əmali şəhris-siyam" kitabında deyilir ki, Şeyx Səduq imam Rzadan (ə) mötəbər sənədlə nəql edir: "Rəsuli-Əkrəm (s) Şəban ayın sonunda (hicrətdən sonrakı illərdən biri) xütbə oxudu  və buyurdu:

Ey insanlar, doğrudur ki, Allahın ayı bərəkət, rəhmət və məğfirətlə sizə üz tutdu; O ay ki, Allah yanında ən yaxşı aydır. Gündüzləri ən yaxşı gündüzlər, gecələri ən yaxşı gecələr və saatları ən yaxşı saatlardır.

O ay ki, siz onda Allahın ziyafətinə dəvət olunmusunuz və Allahın ləyaqət əhlindən olmusunuz. Nəfəsinizin təsbih, yatmağınızın isə ibadət savabı var, əməlləriniz və dualarınız onda qəbul olunar.

Odur ki, düzgün niyyət, günahdan təmizlənmiş və pis xislətlərdən uzaq qəlblərlə Allahdan o ayda oruc tutmağı və Quran tilavət etməyi sizə nəsib etməsini diləyin. Bu ayda Allahın məğfirətindən məhrum olan şəxs, həqiqətən aqibəti pis olan şəxsdir.

Bu ayda susuzluğunuz və aclığınızla Qiyamət gününün susuzluğunu və aclığını xatırlayın. kasıblara və fəqirlərə sədəqə verin, qocalara hörmət edin, uşaqlara rəhm edin, qohumlarınıza yaxşılıq və lütf göstərin. Dilinizi pis sözləri deməkdən saxlayın. Gözlərinizi halal olmayan şeylərdən örtün. Haram səslərdən qulaqlarınızı bağlayın. Yetimlərə nəvaziş göstərin ki, sizdən sonra sizin yetimlərinizə də belə davransınlar.

Günahlarınızdan Allaha tövbə edin, namaz vaxtlarında əllərinizi göyə qaldırıb dua edin. Çünki namaz vaxtları ən gözəl vaxtlardır və o saatlarda Uca Allah bəndələrinə rəhmət gözü ilə baxar, dualarını qəbul edər, onların çağırışlarına müsbət cavab verər və istəklərini yerinə yetirər.

Ey insanlar, canınız əməllərinizin girovudur, ona görə də bağışlanma diləməklə özünüzü xilas edin. Günahların ağır yükü altında belləriniz əyilib, onları uzun səcdələrlə yüngülləşdirin. Allah özünə and içib ki, ibadət edənlərə və səcdə edənlərə əzab verməyəcək, onları cəhənnəm atəşi ilə qorxutmayacaq.

Ey insanlar, sizdən hər biriniz bu ayda oruc tutan möminə iftar verərsə, bir qul azad etməyin savabı ona yazılar və keçmiş günahları bağışlanar.

Ey insanlar, kim bu ayda əxlaqını islah etsə, axirətdə rahatlığa qovuşar. Kim bu ayda şərrini insanlardan uzaqlaşdırarsa, Allah da qəzəbini Qiyamət günü ondan uzaqlaşdırar.

Kim bu ayda bir yetimə nəvaziş göstərərsə, Allah Qiyamət günü ona hörmət edər. Kim bu ayda qohumlarını ziyarət edər və yaxşı işlər görərsə, Allah onu öz rəhmətinə qovuşdurar. Bu ayda kim qohumları ilə bağlarını kəsərsə, Qiyamət günü Allah rəhmətini ondan uzaq edər.

Ey insanlar, bu ayda cənnətin qapıları açıqdır, Allahdan istəyin ki, onları sizin üzünüzə bağlamasın. Bu ayda cəhənnəm qapıları bağlıdır, Allahdan diləyin ki, sizin üzünüzə açmasın. Şeytanlar bu ayda həbs olunur, Allahdan istəyin ki, onların sizə hakim olmasına imkan verməsin.

 

iqna.ir