Monaxizm Yəhudilikdə
Monaxizm yəhudilikdə mövcud olan ürfan və təsəvvüfdən ibarətdir. Yəhudi ürfan və təsəvvüfü Əhdi-ətiqdən qaynaqlanır. Müqəddəs kitaba nəzər etdikdə, peyğəmbərlərlə yanaşı, zahidlərin bir sıra sufiyanə hərəkətlərindən xəbər verildiyini açıq-aşkar görürük. Həmçinin, xüsusilə də, Hezegil nəbi, Daniel nəbi, Üzeyirin, Jubbinin yazılarında ürfanı və sufi təmayüllər çoxdur. Belə ki, bu sonralar, murkaba, kabala, hesidizm kimi ürfanı və sufi cərəyənların yaranmasına gətirib çıxartmışdır. Lakin bu cərəyanlar, tərki-dünyalıq mənasına deyildir. Əlbəttə, məsihiliyin ilkin yaranış dövrlərində bəzi az saylı yəhudilər tərki-dünyalığa meyl göstərdilər. Lakin əksəriyyət, dünya və axirətə birlikdə dəyər verirdilər. Demək olar ki, yəhudilər tərki-dünyalığa meylli olmamışlar. Buna əsas səbəb, özlərini Allahın xüsusi və sevimli bəndələri saymaları, bundan əlavə Maşiyəhin gəlişi ilə dünyaya hakimlik edəcəklərinə inanmaları olmuşdur.
Amma miladdan əvvəl ikinci əsrdə Essenlər adlı bir firqə yarandı. Bəzilərinə görə, "essen" sözünün mənası "şəfa verən" yaxud da "qusul verən" olmuşdur. Onlar rahiblər kimi zahidanə yaşayırdılar. Onlar da evlənmirdilər. Gündə bir neçə dəfə vəftiz edirdilər (qusul alırdılar).
Essenlər Ölü dənizin qərb hissəsində və Fələstində yaşayırdılar. Günlərinin böyük hissəsini ibadətlə keçirirdilər. Fəsad dolu cəmiyyətdən uzaq yaşamağa üstünlük verirdilər. Qızıl və gümüş toplamağı haram bilirdilər. İctimai ədaləti qorumaq üçün fərdi mülkiyyəti ləğv etmişdilər. Heç kimin torpağı və şəxsi mal-mülkü yox idi. Ticarətlə məşğul olan dükanlar belə hamıya aid idi.[1] Bütün qazanclar, paltarlar, yemək və sair hamıya aid idi. Onların qazancı yalnız gündəlik zəruri ehtiyaclarını ödəmək miqdarında olmalı idi.
Josef (Joseph) yazır ki, onlar bir əsrdən çox ömür sürürdülər. Çünki həyatları sadə və intizamlı idi. Ağ kətan paltar geyinirdilər.[2] Onların az bir hissəsi nəslin davam etməsi üçün evlənirdi.[3]
Essenlər də Səduqilər kimi sona çatmış, yox olmuşdur. Təsadüfi deyildir ki, bəzilərinin fikrincə, xristianlığın tərki-dünyalığına səbəb məhz essenlər olmuşdur. Yəhya ibn Zəkəriyyənin bu firqəyə mənsub olduğunu söyləyənlər, İsanın (ə) gəlişindən sonra essenlərin hamılıqla xristian olduğuna inanırlar.[4] Amma romalıların miladın 68-ci ilindəki hücumu nəticəsində essenlərin tamamilə məhv olduğuna inanalar da vardır. Onlar cismani məada inanmır və ruhlarının azad olmaları, ruhi kamilliyə çataraq, ölməz olacaqlarına (ruhani məada) inam bəsləyirdilər. [5]
Monaxizm Xristianlıqda
Monaxizm, dünyanın naz-nemətlərindən tamimilə üz çevirmək, tərki-dünya olaraq ancaq ibadət və dini ayinləri yerinə yetirməklə ömür sürməyə deyilir. Monaxizm aşiqləri, hətta insanlar kimi də yaşamır, onlar evlənmir, Allahın verdiyi halal ruzilərdən belə uzaq qaçır, çox çətinlik və əziyyətlə yaşamağa üstünlük verirlər.
Xristian alimləri monaxizm barəsində müxtəlif əqidələrə malikdirlər. Məsələn, R. Niebuhr monaxizmi məsihi dünyasının bidəti adlandırır. Amma Berdyayev, onu xristianlığın ürəyi və cövhəri hesab edir.
Lakin, demək olar ki, xristian dünyasının əksəriyyəti, tərki-dünya olmağı özünü əsl məsihi sayan hər kəsin yaşayışının bir hissəsi kimi qəbul etməyi lazımlı bilir. Məsihi ruhaniləri isə, bunu özləri üçün zəruri sayırlar. Bu onların ideal saydıqları məsihi həyatıdır.
Katolik və ortodoks kilsələri öz monaxistləri ilə iftixar edirlər. Ruhani olmağa üz gətirənlər «Müqəddəs monaxistlər»in yazdıqlarına əməl etməyə çalışaraq, onları əsl ruhani həyatı üçün nümunə və hədəf seçirlər.
Protestantlar monaxizmi sevmədiklərini iddia etsələr də, onu ictimai yaşayışda “məsuliyyətlərdən qaçan qorxaqların peşəsi” adlandırsalar da, bu məzhəbə aid olan çox saylı məşhur alim və ruhanilərin monoteist olduğunu müşahidə etmək olar. Jakob Boeme də onlardan biri sayılır. Ümumiyyətlə, protestant mənşəli Pietism, metodism, pentikalism və sair kimi elmi hərəkatlar da bu fikri təsdiqləyir.
Qədim xristianların monaxizmə üz gətirmələrinin səbəbini, tarixşünaslar, onların miladın İ-İV-cü əsrində dözülməz işgəncələrə təqiblərə məruz qalması, yurd-yuvalarından didərgin salınaraq çöllərə, səhralara, dağlara sığınmalarında görürlər. Belə ki, İsanın (ə) əzab-əziyyətlə öldürüldüyününə inanan məsihilər, özlərinin də dəhşət və qorxu içərisində yaşadığını gördükdə bunu əsl məsihi həyatı kimi qəbul etmişdilər.
Bəzi qərb tədqiqatçılarının fikrincə, Əhdi-cədidi qələmə alan şəxslər şiddətli təqiblər, təzyiqlərə, zindan və qətllərə məruz qaldıqları üçün ailə həyatı qurmamış, elə buna görə də insanları mübarizəyə və evlənməməyə dəvət etmişlər.
Bəzi tədqiqatçılar, əlləri hər yerdən üzülmüş, ümidi kəsilmiş məsihilərin Allaha pənah apararaq səhralarda, mağaralarda çarəsizlikdən yalnız ibadətlə məşğul olduqlarını da buna bir səbəb sayırlar.
Bütün bunlar Şərq aləmində yaranmış məsihiyyətə aiddir. İlk monaxistlər Misir səhralarında yarandı. Sonra isə Suriya və ərəb ölkələrini fəth etdi. Monaxizmin ilk tanınmış şəxsiyyətləri Antoni (251-356) və Makaryusdur (390-452). Onlar ilk məsihilərin fikir və əqidələrindən təsirlənərək, çox varlı olduqlarına baxmayaraq, bütün var-dövlətlərini sataraq səhralara üz gətirdilər. Aclıq, susuzluq, soyuq-istidən o qədər əziyyət çəkdilər ki, nəhayət, dünyaya əlvida dedilər. Monaxistlər onları indi də ehtiramla yad edirlər.
Qərb dünyasında məsihi monaxizmi İV əsrin sonu, V əsrin əvvələrində yarandı. İlk əsəri bu barədə Yuhənna Kasyanos (438 m) yazdı. Amma monaxizmin Qərbdə atası Benedikt (547) sayılır. O, Basildən (379) ilham alaraq səhra və dağlara üz tutmuş məsihiləri bir yerə cəmləyərək, onların fəaliyyətlərini, ibadətlərini təşkilat formasına saldı. İllər keçdikcə monaxistlərin təşkilatları xeyriyyə və mədəni işlərlə də məşğul olmağa başladı. İndiki rahibələr və rahibləri monoteizmin yadigarları sayırlar.
Pavel heç vaxt evlənmədi. Və tərəfdarlarını da buna həvəsləndirirdi: «İndi sizin mənə yazdıqlarınıza gəlincə, kişinin evlənməməsi daha yaxşıdır.»[6] «Mən arzu edirəm ki, bütün insanlar mənim kimi olsunlar.»[7]
Pavel məsihiləri evlənməməyə həvəsləndirərək bunun səbəbini belə açıqlayırdı: «Evlənənlərin bu həyatda əziyyəti olacaq. Mən isə sizi bundan qorumaq istəyirəm. Evlənmək günah olmasa da, evlənməmək və subay qalmaq daha yaxşıdır. Çünki evli olmayan kişi Rəbbini razı salmaq üçün onun işlərini (ibadətini) layiqincə yerinə yetirir. Evli şəxs isə həyat yoldaşını razı salmaq üçün, dünyəvi işlərin arxasınca gedir. Lakin ilahi işlərin qayğısını çəkən həm cismən, həm də ruhən müqəddəsdir... Mənə elə gəlir ki, əgər insan subay qalarsa, daha bəxtiyar olar.»[8]
Maraqlıdır ki, Tövrata əsasən, Uca Tanrı kişini qadın və qadını kişi üçün xəlq etmiş və onların evlənməsini görmək və bu minvalla, bəşər nəslinin davam tapmasını iradə etmişdir: «Allah-təala Adəmi (ə) yaratdıqdan sonra gördü ki, onun tək qalması münasib deyil (və bəşər nəslinin davam tapması üçün), ona uyğun köməkçi yaratmalıdır. Və Həvvanı onun üçün münasib bilib yaratdı».[9]
Xatırladaq ki, İsa (ə) evlənməyin zərurətinə dəfələrlə işarə etmişdir. Hətta Tövrat və İncilin özündə evlənməyin əhəmiyyəti öz əksini tapmışdır. (Matta, c. 10, 19-cu fəs.)
Monaxizm İslamda
Dinimizdə dünyaya bağlı olmamaq və onun əsirinə çevrilməmək ən ali dəyərlərdən biridir. Belə ki, dünyapərəstlik daim isalamda psilənir. Amma dünyapərəstlikdən məqsəd, Allahın bəşər övladına bəxş etdiyi nemətlərdən üz çevirmək, ona qarşı tam rəğbətsiz olmaq, zahidlik və yaxud özünə əzab-əziyyət vermək deyildir. Diqqət etmək lazımdır ki, Aləmlərin Xaliqi bu dünyanı insanın ondan kifayət qədər bəhrələnməsi üçün yaratmışdır. Bu barədə Qurani-kərimdə buyurulur:
«Allah-taala onlara həm bu dünya mükafatını, həm də axirətin gözəl mükafatını bəxş etdi. Allah yaxşı iş görənləri sevər.»[10]
Buna görə də, insan dünyəvi nemətlərdən bəhrələnməli, ondan zövq almalıdır. Belə ki, Həzrət Əli (ə) dünyadan doğru-düzgün bəhrələnənlər üçün, onun "doğruluq sarayı" olmasını vurğulayır. Dünyanı yaxşı dərk edən şəxs üçün, onun əmin-amanlıq və xoşbəxtlik imarəti olduğunu söyləyir.[11] Deməli, islam dininə görə, insan öz şəxsiyyətinə və mürüvvətinə xələl yetirmədən və israfa etmədən, öz halal istəklərini əldə etməklə dünya naz-nemətindən faydalana bilər.
Həmçinin, bu vasitə ilə hətta dini işlərini sahmana salmaq üçün daha keyfiyyətli nəticə əldə edə bilər. Quranda buyurulur:
"(Müxtəlif zamanlarda ayrı-ayrı ümmətlərə göndərdiyimiz peyğəmbərlərə belə buyurduq:) “Ey peyğəmbərlər! Təmiz (halal) nemətlərdən yeyin və yaxşı işlər görün!"[12]
Elə bunun üçün də, hədislərimizdə buyurulur ki, dünyan üçün elə çalış ki, sanki orada əbədi ömür sürəcəksən və axirətin üçün elə səy et ki, sanki sabah öləcəksən.[13] Mömin şəxs, dünyanı axirətin əkin sahəsi saymalıdır.[14] Dünya möminin axirəti üçün gözəl köməkçi olmalıdır.[15] Bununla da, insan öz maddi və mənəvi işlərini sahmana salmaq niyyətilə dünyadan bəhrələndiyi təqdirdə, bu bir növ islahedici rol oynadığı üçün dünyapərəstlik sayılmır.[16] Məhz bu səbəbdən də, Həzrət Kazim (ə) buyurur: "Dünyasını dininə görə tərk edən, ya dinindən öz dünyasına görə üz döndərən kəs bizdən deyil.»[17]
Deməli, dünyapərəstlikdən uzaq durmaqdan məqsəd, dinini dünyaya satmamaq, dünyaya həris olmamaqdır. Necə ki, Həzrət Əli (ə) buyurur: «Əgər dinini dünyana tabe etsən, dininin və dünyanın hər ikisini itirəcək, axirətdə isə ziyana uğrayanlardan olacaqsan. Amma öz dünyanı dininə tabe etsən, dinini və dünyanı-hər ikisini əldə edəcək və axirətdə də nicat tapanlardan olacaqsan.»[18]
Əlbəttə, islam coğrafiyasında çoxsaylı zahidliyə yönəlmiş təriqətlər mövcud olmuşdu və bu tamam ayrı bir məqalənin mövzusu ola bilər. Amma İslama görə, insan dünyapərəstlikdən və cah-calal hərisliyindən uzaq durmalıdır. Burada dünyapərəstlikdən məqsəd məqam, vəzifə, mal-dövlət, şan-şöhrət və sair kimi dünya həvəsinə qul olmaq, onları əldə etmək üçün canfəşanlıq etmək və bu yolda insanların haqqını tapdamaqdır. Hədislərimizdə dünya məhəbbəti hər bir asiliyin kökü və hər günahın başlanğıcı sayılır. Dini mənbələrimizdə dəfələrlə dünya sevgisinin bütün günahların mənşəyi olmasına təkid olunmuşdur. [19] Belə ki, dünyanı sevmək ən böyük kəbirə günah adlandırılmışdır.[20]
Bunun üçün də, ilk növbədə, onun təhlükəli nəticələrinə agah olmalıdır. Həmçinin, dünyapərəstlikdən uzaq durmağın faydalarını, xeyir-bərəkətlərini bilməklə maddiyat hərisliyindən üz çevirməlidir. Bunun üçün də, dini mənbələrimizdə müxtəlif göstərişlər və yollar qeyd edilmişdir. İlk növbədə, insan dünyapərəstliyin zərərlərinə agah olmalıdır. Ardınca, dünyapərəstlikdən uzaq olmağın xeyir-bərəkətlərini bilməlidir. Sonda isə, bütün bunların müqabilində axirətini dünyaya satmağın nə dərəcədə düzgün qərar olub-olmamasını düşünərək, nəticə almalıdır.
Deməli, İslam dini monaxizmi ifrat şəkildə qəbul etmir. (Hədid, ayə 27) Və aşkarcasına zinət əşyalarını və gözəl yeməkləri özünə haram sayan insanları məzəmmət edir. (Əraf, ayə 31)
İslam peyğəmbəri (s) xalqı tərki-dünya olmaqdan daim çəkindirir, onları evlənməyə, halal ruzilərdən istifadə etməyə doğru çağırırdı. O, rahiblik yolunu tutmuş, öz qadınından və halal ruzilərdən üz çevirmiş, cəmiyyətdən uzaqlaşmış, yalnız ibadətlə məşğul olan Osman ibn Məz`unun yanına gedərək deyir: «Mütləq zahidlik İslam dinində rədd edilmişdir! Qadınlardan uzaq gəzirsiniz? Halbuki mən sizin peyğəmbərinizəm və xanımlarımın yanına gedirəm, gündüz çörək yeyir, gecə yatıram. Hər kəs mənim sünnəmdən kənara çıxsa, məndən deyildir.»[21]
İmam Rza (ə) evlənməyi tərk etmiş qadına deyir: «Bu yolla fəzilətə çatmaq istəyirsən? Bu fikirdən dön, əgər evlənməmək üstünlük olsaydı, xanım Həzrət Zəhra (ə) belə edərdi.»[22]
Qurani-kərim buyurur: «Allahı tanımağın əlaməti və nişanələrindən biri budur ki, O sizin üçün öz cinsinizdən olan zövcə yaratdı ki, onlarla ünsiyyət yaradıb sakitləşəsiniz. Və sizinlə onların arasında məhəbbət, sevgi və rəhmət qurdu ki, birlik, həmrəylik, batini və şəxsi əlaqə yaratmaqla ictimai həyatınızı təmin edib fəsad və çətinlikləri aradan qaldırasınız.» (Rum, 210) Diqqət etmək daha zəruridir ki, İslam dini cismani istəklərin halal-pak yolla ödənilməsini lazım saymaqla birgə, ruhun mənəvi tələblərinin də doyurulmasını vacib sayır.
Məhəmməd peyğəmbər (s) Osman ibn Məz`unu məzəmmət edərək ona eyni halda mənəviyyatdan da, qafil olmamağı tapşırdı: «Ey Osman, Allah-təala məni rahiblik üçün deyil, cisim (bədən) ilə ruhun hüquqlarını birgə qoruyan ədalətli və asan bir şəriətlə göndərmişdir.»[23]
Deməli, İslam dini dünyəvi istəkləri bədənin tələblərini düzgün yolla yetirməklə təsdiq edərək, bununla birgə ruhun mənəvi qidasından, ilahi ibadətdən uzaq düşməməyə də çağırır. Qurani-kərimdən və dini hədislərdən belə nəticə almaq olar ki, əsl həqiqətdə Allah-Təala cismani istəklərin doyuzdurulmasını, ruhani meyllərin bərpası üçün istəyir. Məhəmməd (s) buyurur: «Dünyada üç şey mənim üçün sevimlidir: 1-Qadınlar. 2-Xoş iyli ətirlər 3-Gözlərimin nuru olan namaz.»[24]
Gördüyünüz kimi burada İslam peyğəmbərinin (s) ən çox əhəmiyyət verdiyi namazdır. Evli adamın qıldığı namazın, subay şəxsin namazından 70 dəfə üstün olduğunu deyən İslam dini də evli şəxsin ictimai fəsadlardan daha çox uzaq olduğunu nəzərə aldığı üçün belə hökm edir.[25]
Xatırladaq ki, isalm dini Allaha ibadət və itaətlə yanaşı, onun halal naz-nemətlərindən istifadə etməyi daha məntiqə uyğun sayır. Elə buna görə də Qurani-kərim buyurur: «Biz sizi mötədil ümmət qərar verdik.» (Bəqərə, 143) Yəni, sizin üçün elə bir şəriət göndərdik ki, əgər ona olduğu kimi əməl etsəniz, heç vaxt ifrata varmazsınız. Biz sizə yeyib-içməyi və ilahi nemətlərdən istifadə etməyə icazə verdik, bununla belə israfçılıq edib ömrünüzü qarın və şəhvət yolunda məhv etməyinizi haram etmişik: «Yeyin-için, amma israf etməyin. Tanrı israfçıları sevmir.» (Əraf, 31)
Qurani-kərim başqa bir ayədə dünyanın halal nemətlərindən bəhrələnməyin lazım olmasını belə xatırladır: «Dünyada sənin üçün müəyyən olunmuş qismətini unutma. Öz qismətinə qarşı meylsiz olma!» (Qəsəs, 77)
[1] Flisin Şale, Dinlərin müxtəsər tarixi, səh. 320
[2] Vil Dorant "Mədəniyyətlər tarixi-İman əsri", səh. 630
[3] C. Nas, Dinlər tarixi, səh. 320
[4] Vil Dorant "Mədəniyyətlər tarixi-İman əsri", səh. 632
[5] C. Nas, Dinlər tarixi, səh. 320
[6] Korinflilərə, c. 1, 7-ci fəs. 1-ci məktub
[7] Korinflilərə, c. 7, 7-ci fəs. 1-ci məktub
[8] Korinflilərə, c. 25-40, 7-ci fəs. 1-ci məktub
[9] Varlıq, 2-ci fəs. 21-24-cü cüm.
[10]- Ali-İmran148
[11]- Nəhcül-bəlağə, 131 hikmət.
[12]- Muminun51
[13]- Tənbihül-xəvatir, c. 2, səh. 234
[14]- Əvaliyül-layi, c. 1, səh. 267; Nəhcül-bəlağə, xütbə 156
[15]- Biharül-ənvar, c. 73, səh. 127
[16]- Kənzül-ümmal, 5439
[17]- Biharül-ənvar, c. 78, səh. 321
[18]- Qürərül-hikəm, hədis 37503751
[19]- Tənbihül-xəvatir, c. 2; əl-Kafi, c. 2, səh. 315
[20]- Kənzül-ümmal, hədis 6074
[21] Biharül-ənvar, c. 73, 93
[22] Biharül-ənvar, c. 103, hədis 219
[23] Üsuli-Kafi, c. 5, səh. 494
[24] Birharül-ənvar, c. 76, səh. 141
[25] Biharül-ənvar, c. 103, səh. 217, 221
PhD. Əfzələddin Rəhimli (İlahiyyat üzrə Fəlsəfə doktoru)