İnsanın dinə ehtiyacı

Din həyatın təfsirində, hidayət olunmasında, dünya və axirət səadətinin təmin edilməsində vacibdir. Din insanların ruhi ehtiyaclarından biridir və əsas rola malikdir. Çünki din öz hidayəti ilə insan həyatını məqsədyönlü edir. İnsanın mənşə və məada inanmasına zəmin yaradır. Mənşə və məada inanmaq isə həyatın məşəqqət və problemlərinə məna verir və insana rahatlıq bəxş edir. “Ənam” surəsinin 40-cı ayəsində bu haqda buyurulur: “(Müşriklərə) de: Mənə deyə bilərsinizmi? Sizə Allahın əzabı gəlsə və ya qiyamət başınızın üstünü alsa, Allahdan başqasına dua edib yalvaracaqsınızmı? Əgər doğru danışanlarsınızsa (deyin görək)!”

İnsan heç bir şəraitdə dinsiz yaşaya bilməz. İnsan təkbaşına və cəmiyyətdən uzaq yaşaya bilmədiyi kimi, dini mahiyyəti də var və dinsiz düzgün və doğru həyat sürə bilməz. Çətinliklərdə və problemlərdə Allaha sığınmaqdan güclü dəlil yoxdur. Necə ki, “Ənkəbut” surəsinin 65-ci ayəsində buyurulur: “(Müşriklər) gəmiyə mindikləri zaman (dəryada batacaqlarından qorxub) dini (ibadəti) yalnız Ona məxsus edərək (ixlasla) Allaha dua edərlər. Allah onları sağ-salamat quruya çıxaran kimi, yenə də (Ona) şərik qoşarlar".

Yaradan, mehriban və bağışlayandır. Onları diriltmək, həyatlarını halal və nizam-intizamlı etmək üçün dini yaratmışdır. Həmçinin problemlərdən və hadisələrdən xilas olmaq şərik qoşmaq üçün deyil, şükür etmək üçündür.

Firavan və normal həyatda olan insan adətən qafil olur. Lakin çətinliklərlə qarşılaşdıqda qəflət pərdəsi götürülür və insanın Allahı axtarma və tövhid xisləti üzə çıxır. Din mənşə və məad ideyası və insanın yaradılış fəlsəfəsini bəyan etməklə insanın həyatına məna verir.

iqna.ir