Fitrə zəkatı nədir və bu il adambaşı neçə laridən hesablanmalıdir?

29 Aprel 2022 - 11:33

Fitrə zəkatı – Fitr bayramının axşamı, günəş batdığı vaxt həddi-büluğa çatan və ağıllı olub, bihuş, fəqir və başqasının qulu olmayan şəxsə, özü və onun çörək yeyəni sayılan şəxslərin hər biri üçün, bir "SA" – təqribən 3 kiloqram – öz şəhərində normal olan yeməklərdən, məsələn; Buğda, Arpa, Xurma, Kişmiş, Düyü və Qarğıdalı kimi, müstəhəqqə (maddi durumu yaxşı olmayan şəxsə) verməlidir.

Bu il Gürcüstanda adambaşı fitrə zakatının miqdarı ən azı 6 laridən hesablanmalıdır. Yəni əgər ailədə 4 nəfər varsa, 24 lari fitrə verilməlidir. Bunu da bilmək lazımdır ki, qeyd olunan məbləğ ən az hesab olunan miqdardır və hər kəs istəsə, adambaşı 6 laridən artıq da hesab edib, ödəyə bilər.

Fitrə zəkatı vacib olan əməllərdən biridir və İmam Sadiq (ə) fitrə zəkatı haqqında buyurur: Namazda Peyğəmbərə (s) salavat göndərməklə namaz tamamlandığı kimi, Fitrə zəkatı verməklə də insanın orucu tamamlanar. Ona görə də əgər insan oruc tutsa və bilərəkdən fitrə zəkatını verməsə, həmin orucun o şəxsə heç bir faydası olmaz və o, tutduğu orucdan bəhrə aparmaz.

Allah oruc, dua, namaz və digər ibadətlərinizi qəbul eləsin.

Amin!

Hacı Elçin Əliyev