Bərzəx aləmi nədir?

09 Dekabr 2021 - 14:55

O kəslər ki, bizdən əvvəl ölüblər, bizə nisbətdə bərzəx həyatları daha uzundur. Bəs bərzəx nədir? Lüğətdə iki şey arasına hədd qoyan fasiləyə bərzəx deyilər. Bərzəx aləmi - müvəqqəti həyatla cavidan həyat arasına hədd və fasilə qoyan bir aləmdir ki, dünyasını dəyişən hər bir insan ora gedər.

Bəzi insanların bərzəx aləmində uzun müddət yaşamağının Allahın ədaləti ilə heç bir ziddiyəti yoxdur. Böyük din alimlərindən biri deyir: "İnsan öləndən sonra malik olduğu etiqada görə və bu dünyada yerinə yetirdiyi yaxşı və pis əməllərə görə xüsusi sorgu-sual olacaqdır. Qısa bir mühasibədən sonra isə alınan nəticəyə görə ya şirin bir həyatda yaşayar, ya da acı bir həyata məhkum olar ki, Qiyamət gününə qədər orada qalar. Bu, insanın dünyada məhkəmə tərəfindən mühakimə olmasına bənzəyər. İnsanın ruhu bərzəx aləmində dünyada olduğu kimi yaşayar. Əgər yaxşı insandırsa, Allah dərgahının pakları ilə bir yerdə nemətdən bəhrələnər. Əgər pis insandırsa, əzab olunar".

Ona görə də bərzəx aləminin bəziləri üçün uzunmüddətli olması Allahın ədaləti ilə ziddiyyət təşkil etməz. Çünki insanların hamısı orada Qiyamət gününə qədər əməllərinin qonağı olar. İmam Səccad (ə) buyurur: "Qəbir (həmin bərzəx aləmidir ki) ya behişt bağlarından və gülüstanlarındandır, ya da cəhənnəmin atəş quyularından". Hər nə olursa-olsun, insanın əməlinin nəticəsi olar.

İmam Əli (ə) buyurur: "Hər kim ölər, onun Qiyaməti bərpa olar". Yəni, insanın dünyasını dəyişməsi ilə hesab və mühakiməsi başlayar. Ona görə də bərzəx həyatı insanın ruhuna və əməllərinə qayıdan bir aləmdir. İnsanların bəziləri şəhidlər kimi pak halda behiştə qədəm basar və onun gözəlliyindən bəhrələnər, bəziləri müvəqqəti olaraq cəhənnəmə düşər və cəzalarını çəkəndən sonra behiştə daxil olarlar, ancaq bəziləri isə əbədi olaraq cəhənnəmdə qalarlar.

Hədislərdən belə nəticəyə gəlmək olur ki, bərzəx aləmində insanlar 3 dəstə olacaqlar:

1. Xalis möminlər ki, Qiyamət gününün tez bərpa olmasına görə dua edərlər.

2. Əzab əhli ki, Qiyamətin gəlməsini istəməzlər.

3. O insanlar ki, nə əzab görər və nə də nemət, yuxuda olar və hissiz halda olarlar, Qiyamət günü ayılarlar.

Beləliklə, deyə bilərik ki, insan öləndən sonra iki aləmə düşər: bərzəx və əbədi axirətə. İlk düşdüyü bərzəx aləmində ciddi şəkildə cəzalanmaz və mükafatlanmaz. İnsan əməlinin həqiqi nəticəsini Qiyamət günü görər. Həqiqi və daimi həyat - axirət aləmindədir.

Allah cəmimizi həmin gündə amanda saxlasın.

 

milli.az