Ən son

Şeytani fikirləri necə kontrol edə bilərik?

01 Aprel 2021 - 14:46

İnsan şeytani fikirləri necə nəzarətə götürə bilər?

Şeytani düşüncələri kontrol etməyin bəzi yolları vardır ki, onlarla tanış olaq:

1. Ağıldan faydalanmaq. İmam Əli (ə) buyurur: “Həqiqətən qəlblər üçün pis xahişlər və düşüncələr vardır ki, ağıl onlara mane olar”.

Ona görə də ağlı qəlbin gözətçisi hesab etmək olar. Əgər insan ağlı inkişaf etmiş olarsa, şübhəsiz ki, həm şəhvətinə və həm də pis fikirlərinə qalib gələcəkdir.

2. Allaha diqqət etmək. “Şübhəsiz, təqvalı olanlara şeytandan bir vəsvəsə yetişsə, (ya qəlblərdə dolanan bir şeytan onların fikirlərinə zərər-ziyan yetirsə, dərhal) (Allahı yadlarına salaraq) özlərinə gələr və onda gözüaçıq olarlar”. (“Əraf” 201).

İmam Sadiq (ə) bu ayə haqqında buyurur: “Günah vəsvəsəsi bəndənin sorağına gələr. O, Allahı yada salar. Təzəkkür alıb, yerinə yetirməz”.

3. Xəyal qurmaqdan uzaq olmaq. İmam Əli (ə) buyurur: “O kəs ki, günahın ətrafında çoxlu düşünər, nəhayət ona tərəf çəkilər”.

4. Boş vaxtı doldurmaq. Həzrət Peyğəmbər (s) buyurur: “İki sifət insanların çoxu üçün fitnə mənbəyidir: bədən sağlamlığı və bekar olmaq”.

5. Hisslərini kontrol etmək. “(Etiqad, danışıq və əməldə) bilmədiyin şeyin arxasınca getmə. Çünki qulaq, göz və ürəyin hər biri sorğu-suala tutulacaqdır (insandan onların işləri barədə və onlardan öz işləri barəsində soruşulacaqdır)”. (“İsra” 36).

Fikri kontrol etməyin ən mühüm yollarından biri – zahiri hissləri kontrol etməkdir.

6. Gözəl adətlərə yiyələnmək. “Və namazı günün iki tərəfində və gecənin gündüzə yaxın əvvəllərində qıl (sübh namazını günün birinci yarısında, zöhr və əsr namazlarını günün ikinci yarısında, məğrib və işa namazlarını isə gecənin əvvələrində qıl) ki, həqiqətən (namaz başda olmaqla) yaxşılıqlar günahları aradan aparır (günahın çirkinliyini nəfsdən, onun fəsadlarını aləmdən, onun ləkəsini əməl dəftərindən və əzaba düçar olmağı günah etmiş şəxsdən uzaqlaşdırır). Bu, yada salıb xatırlayanlar üçün bir öyüddür”. (“Hud” 114).

Bəli, yaxşılıqlar nəhayət günahları aradan aparar. Ona görə də gözəl adətlərə yiyələnmək şeytani fikirlərə qalib gəlməyə yardım edər.


 

deyerler.org