Ən son

Quranı üzündən oxumağın nə faydaları vardır?

15 Oktyabr 2020 - 13:53

Müqəddəs Quran – insana əta olunan ən qiymətli nemətdir. İnsan Quran vasitəsilə kamala çata bilər. Çünki Quran insana kamal yolunu göstərər və onu doğru yola hidayət edər. Həzrət Peyğəmbərin (s) risalətindən biri – insanlara Quran oxumağı öyrətmək olmuşdur. Bu yolla onun nurundan bəhrələnsinlər və həyat bulağından su içsinlər.

Bəs Quranı üzündən oxumağın nə faydaları vardır?

1. Allahla söhbət etməkdir. Quran – əslində Allahın insanlara yazdığı məktubdur. Hər kim onu oxuyar, Allahla söhbət etmiş olar.

2. Quranın hidayətlərindən bəhrələnər. Quranı üzündən oxumaq – mənəvi təkamül və hidayət yolunu hamar edər. İnsan Quran oxuyaraq onun qanunları, qadağaları və savabları ilə tanış olar. Sonra bu bildiklərinə əməl edərək, hidayət olar.

3. Günahı tərk edər. İnsan Quran oxuyan zaman ayələri dərk etməyin ləzzətini dadar. O zaman ki, ayələri dərk etməz, başa düşər ki, buna mane olan amillər vardır. O cümlədən, günah insana ayələri başa düşməyə mane olar. Bu yolla insan Quran oxuyaraq, günahdan da uzaq olmağa cəhd edər.

4. Duaları qəbul olunar. Quranla daim ünsiyyətdə olmaq – insana şərafət verər. Şərafətli insan Allahdan nə istəsə, Allah ona verər.

5. Nuraniyyət amilidir. Quran insanın nurani olmasına səbəb olar. Həzrət Peyğəmbər (s) Əbuzərə buyurur ki, Quran oxusun. Çünki Quran oxumaq – onun mələkut aləmində anılmasına və yer üzərində nurani olmasına səbəb olar.

 

deyerler.org