Ən son

Bu qapını açmaq üçün 3 qızıl açar

10 Iyul 2019 - 21:20

Hər kəs gedəcəyi yolda işinə yarayacaq sərmayələrə sahib olmalıdır. Dünyada hədəflədiyin bir məqama sahib olmaq üçün, oraya apara biləcək və o mühitdə dəyər kəsb edən sərmayələr işinə təkan verə bilər. Burada ən əsası odur ki, gedəcəyin yolun sərmayələrini tanımalı və onları ələ gətirəcək vasitələri düzgün olaraq dəyərləndirməlisən.

Eyni ilə mənəvi mövzularda da insan müəyyən nəticələrə sahib olmaq istəyirsə, bu müstəvidə müəyyən sərmayə əldə etməlidir. Bunu bizə daha əyanı şəkildə Həzrət Əli (ə) “Kumeyl” duasında izah edir.

Duadan başqa əlində heç nəyi olmayan bu naçar bəndəni bağışla!

“Dua möminin silahıdır” hədisi bəndənin çətin günlərdə əlindən yerə qoymamalı bir yarağının olduğunu xatırladır. Əmirəlmöminin (ə) duanın bu hissəsində bizə önəmli bir məsələnin ipuclarını verir. Belə ki, bir ömür boyu qıldığımız namazlara, tutduğumuz oruclara, etdiyimiz digər mübarək əməllərə ümid edərək Allah qapısına gedilməməlidir. Allah qapısına yalnız Onun rəhmətinə və əfvinə sığınaraq gedilməlidir.

Dua əslində bir yalvarış və çağrışdır. İlahi rəhmətə güvənərək, Ona səslənməli və edilən əməlləri unudaraq, rəhminə sığınmalıyıq. Ən ali saydığımız əməllərin belə, O mübarək zatın müqabilində dəyərəsiz olduğunu anlamalıyıq.

Ümid və göz yaşlarından başqa heç nəyi olmayan bu bəndənə rəhm et!

Duanın bu hissəsində də İmam (ə), Rəbbimizin bizdən gözlədiyi ən önəmli mövzunu diqqət mərkəzinə gətirir. Ümid – Allahın bəndəsində görmək istədiyi və ən önəm verdiyi xüsusiyyətdir.

İlahi dərgaha yönəldikdə elə sərmayə ilə müraciət edilməlidir ki, o sərmayə İlahi dərgahda dəyərə malik olsun. İmam (ə) da əməllərini, xidmətlərini deyil, ümidini götürərək İlahi qapıya üz tutur. Əməllərimizin qəbul olub-olmadığı sual altındadır, amma Allah Təala ümidləri boşa çıxarmayacağına söz verib.

Duada ümidlə bərabər, digər önəmli bir sərmayədən də söz açılır. Allah qatında şəhid qanından, alimin mürəkkəbindən sonra ən böyük dəyərə malik olan damçı – İlahi dərgahda tökülmüş göz yaşlarıdır. Əmirəlmöminin (ə) mövcud olan ən böyük sərmayələrdən – dua, ümid və göz yaşlarını tanıtmaqla, bizə növbəti lütfünü edərək yeni, bir pəncərə açmış olur.

Allah Təala bizə bu sərmayələrə sahiblənməyi nəsib etsin.

 

deyerler.org