Ən son

Siqaret çəkmək görmə qabiliyyəti itməsinə səbəb olur

03 Iyul 2019 - 20:45

Mütəxəssislər siqaret çəkməyin ağciyərlər qədər gözlərə də zərər verdiyi barədə xəbərdarlıq edirlər.

Deyerler.org BBC-yə istinadən xəbər verir ki, Böyük Britaniya Kral Milli Korlar İnstitutu (RNİB), siqaret çəkənlərdə görmə qabiliyyətinin itməsi riskinin, çəkməyənlərə nisbətən iki dəfə daha çox olduğunu açıqlayıb.

Bunun səbəbi isə, tütündən çıxan tüstünün gözlərə mənfi təsiri və gözə gedən qan damarlarının tutulma təhlükəsidir.

Mərkəzi ofisi Böyük Britaniyada yerləşən Optometri cəmiyyətinin sorğusuna görə, siqaret çəkmək ilə görmə qabiliyyətini itirmək arasında əlaqənin olması elmi baxımdan sübut olunsa da, ölkədə yalnız hər 5 nəfərdən biri bu vəziyyətdən xəbərdardır.

Siqaret tüstüsündə zəhərli kimyəvi maddələr var. Bunlar gözlərə zərər verir. Məsələn, qurğuşun və mis kimi ağır metallar, göz bəbəklərinin arxasındakı şəffaf təbəqədə, göz bəbəyində toplanır. Bu da işıq selini gözün mərkəzinə daşıyır və bəbəyin dumanlı görünməsinə, kataraktaya səbəb olur.

Siqaret çəkmək, diabetdən qaynaqlanan görmə qüsurlarını da, gözün torlu qişasının arxasındakı qan damarlarına zərər verərək, daha da ağırlaşdırır.

Ekspertlərə görə, siqaret çəkənlərdə yaşa bağlı “makula degenerasiyası” (sarı nöqtə xəstəliyi) keçirmə riski də üç dəfə çox olur. Makula degenerasiyası insanın mərkəzi görmə qabiliyyətinə zərər verib incəlikləri ayırd etməsini çətinləşdirir.

Siqaret çəkənlərdə, həmçinin çəkməyənlərlə müqayisədə ani görmə qabiliyyətinin itkisi riski 16 dəfə çoxdur. Bu da gözə qan axınına mane törədən optik neyropatiyadan qaynaqlanan bir narahatlıq kimi ortaya çıxır.

Optometri cəmiyyətinin sorğusunda 2006 insan iştirak edib. Sorğuda iştirak edənlərin 18%-i siqaret çəkməyin korluğu və görmə qabiliyyətini itirməyi artırdığını deyiblər, ancaq təxminən üçdə ikisi də (76%) siqaret çəkməyin xərçənglə əlaqəli olduğunu deyib.

Cəmiyyət gözləri qorumağın ən yaxşı yolunun siqaret çəkməyi tərgitmək və müntəzəm göz müalicəsinə getməyin olduğunu vurğulayır.