Ən son

Ali dini Rəhbər: “Şəban – dua və oruc ayıdır”

10 Aprel 2019 - 20:20

Ali dini Rəhbərin nəzərində Şəban ayının fəzilətləri ilə tanış olaq: “Şəban ayı – ibadət və münacat ayıdır. Həzrət Peyğəmbər (s) ömrünün son günlərinə qədər Şəban ayını böyük və əziz tutmuşdur və bu ayı ibadətlə məşğul olar və oruc tutardı. Allahdan istəyim budur ki, bizə də Şəban ayında Peyğəmbərin (s) sünnətinə riayət etməyi nəsib etsin!

Ramazan ayı – İlahi ziyafətin sarayıdır. Hər kim bu əzəmətli saraya daxil olar, Allahın orada hazır etdiklərindən fayda apara bilərsə – Ramazan ayını dəyərli keçirmiş olar. Bu saray ancaq Ramazan ayına məxsusdur, başqa aylara deyil. Bu İlahi ziyafətlər ibarətdir: İlahi rəhmətdən, İlahi tövfiqdən, İlahi qürbdən, maddi və mənəvi ruzidən...

Bütün bunlar Ramazan ayının ziyarət süfrəsinə qoyulmuşdur. Bəzi insanlar gələr və bu süfrəyə heç nəzər belə salmazlar. Bu süfrənin ortasından keçib gedərlər. Bəziləri bu süfrədən çox az bir şey götürərlər. Ancaq insanların elələri vardır ki, bu süfrə başında saatlarla əyləşər və kisələrini bu ziyafətlərlə doldurarlar. İzzət istəyərlər, axirət istəyərlər, dünya istəyərlər, çətinliklərinin aradan qalxmasını istəyərlər, ruzilərinin artmasını istəyərlər, gözəl əxlaq istəyərlər. Həm özləri və həm də başqaları üçün istəyərlər.

İnsanın bu saraya daxil olan zaman ayıq olması üçün və qəflətdən uzaq olması üçün Rəcəb və Şəban aylarından kifayət qədər istifadə etməsi lazımlıdır.

Rəcəb ayı daha çox namaz ayıdır. Şəban isə dua və oruc ayıdır. Bu ayda “Şəbaniyyə” münacatına diqqət edək və onunla qəlblərimizi yumşaldaq.

Bu qəlb – qəribə bir şeydir. Bəzən insanı səmaya və mənəviyyatın ən yüksək nöqtəsinə qaldırar, bəzən isə sərt daşa çevrilər. İnsanı günaha qərq edər və boğar.

O qəlb ki, filan cür avtomobilə ürək bağlayar – o qəlb daşlaşmış qəlbdir. Bəlkə qəlb deyil, qarajdır.

O qəlb ki, Allahın məkanıdır – o həqiqi qəlbdir. Çünki həqiqi qəlb nurun məkanıdır, zülmətin deyil.

Bu mübarək ayın fəzilətlərindən Ramazan ayının ziyafət süfrəsindən faydalana bilmək üçün istifadə edək və hümmət göstərək!”.

Həzrət Peyğəmbər (s) Şəban ayı ilə bağlı buyurur: “Hər kim Şəban ayında (həftənin) birinci və dördüncü günlərini oruc tutarsa, Allah onun 20 dünya hacətini və 20 axirət hacətini yerinə yetirər”.

 

 

deyerler.org