Ən son

Tanıyaq ki, hədər olmayaq

04 Aprel 2019 - 14:35

Ətrafımızda gördüyümüz hər dəyərli-dəyərsiz əşyanın bir istifadə yeri var. Hər hansısa bir əşyanı, məsələn sapı, bizə göstərsələr onun harada işə yaraması, onun yaranma hədəfi haqqında uzun-uzadı danışa bilərik. Çünki, ətrafımızda olan sonradan düzələn bütün əşyalar bir işdə istifadə olması üçün yaradılıb. Bəs görəsən insan nə üçün yaradılıb?

Heç bu qədər mühüm və cavabının verilməsi zəruri olan sual haqqında düşünmüşükmü?

Biz öz kimliyimizin həqiqətini müəyyən edə bilməsək, istiqamətimizi və hədəfimizi düzgün müəyyən edə bilməyəcəyik. Tanımadığımız heç bir detalı hədəfinə uyğun işlədə bilmərik. Bəs necə ola bilər ki, insan özündən bixəbər halda hədəflər təyin edir və bir ömür o hədəfinə çatmaq üçün çalışır? Stəkandan zibil qabı kimi istifadə edildikdə narahat olub, etirazımızı bildiririk. İnsanın də dəyəri bilinməsə, ona lazım və şəninə uyğun olmayan mövzularla doldurulacaq.

Qurani-Kərim insanın yaradılışının hədəfi ilə bağlı yaranan suala konkret olaraq bir cavab verir. “Zariyat” surəsinin 56-cı ayəsində: "Mən cinləri və insanları yalnız Mənə ibadət etmək üçün yaratdım!" deyə buyurulur. Bu cavabın özü belə insanı təfəkkürə və bir sıra suallara cavab tapmağa istiqamətləndirir. Rəbbimizin insanın yaradılışının hədəfi ilə bağlı yaranan suala verdiyi cavab, daha çox qoyduğumuz sualın cavabının harada axtarılmalı olduğuna istiqamət verir.

Hər kəs bu mövzunun önəmliliyini anlamalı və içində bu sualın yaratdığı boşluğu düzgün doldurmalıdır.

Bütün hərəkətlər tarazlığın pozulmasından sonra başlanır. Hər bir insanın qəlbində bu mövzu ilə bağlı axtarışı olmalıdır. Bu axtarış istiqaməti insanı bir çox həqiqətlərdən agah edəcək. Alimlərin də qeyd etdiyi kimi, “İnsanın özünü düzəltməkdən başqa vəzifəsi yoxdur”.

İnsan özünü tanımadan, yaradılış hədəfini bilmədən, onun özünü düzəltməsi mümkün deyil. Həzrəti Əli (ə): “Özünü tanıyan – Rəbbini tanlıyar” deyə buyurub. Bütün mövzuların başında insanın özünü tanıması gəlir.

Yaradılış hədəfimizi anlamaq ümidi ilə...

 

Mətləb Həmzəli