Ən son

İnsan bundan ümidini kəssə, böyük nailiyyət əldə edəcəkdir

05 Fevral 2019 - 15:24

Həzrət Peyğəmbər (s) buyurur: “Dünya dəyişkəndir, sabitliyi yoxdur. O şey ki, sənin üçün təqdir olmuşdur – sənə çatacaqdır, baxmayaraq ki, zəif və gücsüz olsan belə. O şey ki, sənin ziyan və zərərinədir – yenə sənə çatacaqdır, baxmayaraq ki, qüdrətli və güclü olsan belə. Heç bir zaman onun qarşısını ala bilməyəcəksən. O kəs ki, əlindən gedənə ümidini kəsərsə - bədəni rahatlıq tapar. O kəs ki, Allahın ona verdiklərinə razı olarsa – qəlbi və gözü aydın olar”.

Hədisin şərhi.

Həzrət Rəsuli-Əkrəm (s) ilk növbədə dünyanın vəziyyətini bəyan edir. Buyurur ki, dünya fırlanmaqda və dəyişməkdədir. Yəni, dünya heç bir zaman heç kəs üçün sabit qalmamışdır. Bu, dünyanın vəziyyətidir.

O şey ki, təqdir olmuşdur – sənə çatacaqdır. Bu, o deməkdir ki, insan bəzən düşünür ki, çox zəif və qüdrətsizdir. Ona görə də dünyanın bəzi mənfəətlərini əldə etməyi imkansız hesab edər. Ancaq həmin mənfəət onun üçün təqdir olduğu üçün, ona mütləq çatar.

Ziyan və zərər də o cürdür. Bəzi qüdrətli və güclü insanlar elə bilir ki, onlara heç bir zaman ziyan və zərər çatmaz. Çünki qüdrət sahibidirlər və gücləri vardır. Lakin təqdir belə demir. Həmin ziyan ona mütləq çatır.

Onu heç bir zaman özündən uzaqlaşdıra bilməzsən – o deməkdir ki, nə özün üçün mənfəəti cəlb edə bilərsən, nə də ziyandan qaça bilərsən.

Əgər insan həyatda əldə etmək istəyib, ancaq əldə edə bilmədiklərinə və həmçinin əlində olanları itirdiyinə görə ümidini kəsərsə - bədəni və ruhu rahatlıq və hüzur tapar. Yəni, bunun fikrində olma ki, ey kaş, o şeyləri əldən verməzdim. Çalış ki, əldə edə bildiklərinin fikrində olasan.

Əgər insan Allahın ona verdiklərinə razı olarsa, gözü aydın olar. Çünki bu nemətləri ona Allah vermişdir. O kəs ki, Allahın ona verdiklərini görər və ona görə şakir – yəni, şükür edən olarsa, Allah həmin insandan razı olar. Qəlbini və gözünü bu nemətlərin bərəkəti ilə nurlandırar. Bu insan bilər ki, hər şey Onun əlindədir. Ona görə də onun hikmətinə və təqdirinə razı olar və şükür edər.


 

deyerler.org