Ən son

Bu gün İmam Sadiqin (ə) şəhadət günüdür

09 Iyul 2018 - 18:20

Müsəlmanların 6-cı imamı İmam Cəfər Sadiq (ə) hicri 83-cü il rəbiül-əvvəl ayının 17-də Mədinə şəhərində dünyaya göz açmışdır. Atası İmam Muhəmməd Baqirdir (ə). Anası İmam Əlinin (ə) əshabından olan Muhəmməd ibn Əbu Bəkrin nəvəsi idi. Muhəmməd ibn Əbu Bəkrin anası isə təqvalı, Xanım Fatiməyə (s.ə) xidmət etmiş Əsma binti Üməys idi.

İmam Sadiq (ə) babası İmam Səccad (ə) dünyadan köçəndə 15, atası şəhid olduqda isə 34 yaşında idi.

İmam Sadiqin (ə) dövründə xilafətə rəhbərlik edən xəlifə Mənsur Dəvəniqi Əhli-Beyt (ə) davamçılarına qarşı öz sələfləri kimi amansızlıq göstərirdi. Xəlifə Bəni-Haşim nəslindən bir neçə mömini şəhid etdikdən sonra Şəybə adlı bir kişini Mədinəyə vali təyin etdi. Vali İmam Sadiqin (ə) hərəkətlərini nəzarət altında saxlamalı idi. Şəybə cümə günü namazdan sonra minbərə qalxıb, İmam Əli (ə) və Peyğəmbər (s) xanədanı haqqında nalayiq sözlər dedi. İmam Sadiq (ə) ayağa qalxıb etiraz etdi və valinin niyyətini açıqladı.

Xəlifə Mənsur İmamı (ə) mübarizə yolundan döndərməyə müvəffəq olmadığı üçün onu şəhid etmək qərarına gəldi. Hicri 148-ci il şəvval ayının 25-də İmam (ə) zəhərələnərək, şəhid edildi.

Həzrətin (ə) pak vücudu Mədinədə Bəqi qəbiristanlığında dəfn edilmişdir.

İmam Sadiq (ə) şəhadət münasibətilə başda İmam Zaman ağa (ə.f) olmaqla, bütün müsəlmanlara başsağlığı veririk.


 


deyerler.org