Ən son

Atanın haqqı. Ailəni idarə etmək üçün kişiyə lazım olan 3 xüsusiyyət

04 Aprel 2018 - 21:55

Övladın atasına itaət etməsi – İslamın qoyduğu vacib haqlardan biridir. Həzrət Əli (ə) buyurur: “Atanın haqqı odur ki, övladı Allah günahından savayı hər şeydə ona itaət etsin”.

Həzrət Peyğəmbər (s) atanın övladı üzərində olan haqqı barəsində buyurur: “Onu adı ilə çağırmayın. Ondan qabaqda yol getməyin. Ondan qabaqda əyləşməyin”.

Bir nəfər əziz Peyğəmbərimizə (s) deyir: “Atam mənim malımı özününkü etmək istəyir”. Həzrət (s) buyurur: “Sən də, malın da atanınkıdır”.

Həzrət Peyğəmbər (s) buyurur: “Allahın razılığı – atanın razılığındadır. Allahın narazılığı atanın narazılığındadır”.

İmam Səccad (ə) buyurur: “Allah o kəsdən daha çox razı olar ki, ailəsini daha çox rifah və nemətdə qərar verər”.

İmam Sadiq (ə) buyurub ki, kişi evini və ailəsini idarə etmək üçün 3 işi yerinə yetirməlidir. Baxmayaraq ki, xasiyyətinə uyğun olmasa belə: xoşrəftar olmaq, ölçüsündə əliaçıq olmaq, qeyrət və namusluluq.

İmam Sadiq (ə) buyurur: “Övladın ata üzərində üç haqqı vardır: onun üçün yaxşı ana seçmək, ona yaxşı ad qoymaq, tərbiyəsində səy göstərmək”.

Allah Təala cəmi möminləri valideynin haqqını tanıyanlardan qərar versin.

 

deyerler.org