Ən son

Ailədə sərt davranışın fəsadları

06 Aprel 2016 - 11:19

Ailə - müqəddəs bir ocaqdır. Dinimizin buyuruşlarında ailədə mehriban davranmağımız tövsiyə olunmuşdur. Hər kəs ailədə mehriban olsa – özü üçün Allah tərəfindən savab və cənnət qazanar, sərt olsa – İlahi əzaba düçar olar. Bunun təsdiqi üçün gəlin birlikdə nəql olunmuş hədisə nəzər salaq.

Ənsarın rəisi Səd ibn Məaz Həzrət Peyğəmbərin (s) və ümumiyyətlə müsəlmanların nəzərində çox möhtərəm bir şəxs idi. Süvari halda gəldiyi zaman Peyğəmbər (s) buyurdu ki, müsəlmanlar onun istiqbalına getsinlər. Səd içəri daxil olanda Allahın Rəsulu (s) özü ayağa qalxmışdı. Yəhudilərin hakimliyi ona tapşırılmışdı.

Səd vəfat edəndə yetmiş min mələk onun dəfnində hazır olmuşdu və Həzrət Peyğəmbər (s) ayaqyalın halda onun tabitunu götürdü və buyurdu: "Mələklərin cərgələri Sədin dəfnində hazır idilər, əlim Cəbrailin əlində idi, hara gedirdisə, mən də gedirdim". Bir sözlə, Həzrət Peyğəmbərin (s) yanında belə hörmətli olan və bu şəkildə şərəflə dəfn olunan Sədi, Rəsuli-Əkrəm (s) öz əliylə qəbirə qoyanda, Sədin anası dedi: "Xoş halına sənin, cənnət sənə nəsib oldu". Həzrət Peyğəmbər (s) Sədin anasına buyurdu:"Haradan bilirsən ki, oğlun cənnət əhlidir? Hal-hazırda oğlun Səd qəbir əzabı görür və bunun da səbəbi – ailədə sərt olmağıdır".

Möhtərəm müsəlmanlar, gördüyümüz kimi, bu cür şərəflə dəfn olunan Səd qəbir əzabına düçar oldu və bunun da səbəbi – ailədə sərt olması idi. Bu hadisə bizə bir ibrətdir ki, ailədə mehriban davranaq. Əks təqdirdə, ailədə sərt olsaq, biz də qəbir əzabına düçar olacağıq.

Allah Təala bizə ailədə mehriban olmaq tövfiqatını nəsib etsin.

 

deyerler.org