Ən son

Allah dərgahında dəyərli olan 3 səs

18 Mart 2018 - 20:07

Həzrət Peyğəmbər (s) buyurur: “Üç şey vardır ki, hicabları parçalayar (pərdələri yarar) və Allah əzəmətinin dərgahına çatar:

1. Alimlərin yazan zaman qələmlərinin səsi.

2. Mücahidlərin cihad meydanındakı addım səsləri.

3. İffətli qadınların ip əyirən alətlərinin səsi”.

Başqa hədisdə isə lənətlənən 2 səs barədə danışılır. İmam Əlidən (ə) nəql edilir: “Peyğəmbər (s) buyurmuşdur: “İki səs lənətlənib və Allah onlara nifrət edir: müsibət vaxtı ah-zar edib şivən qoparmaq və nemət vaxtı (məstliyindən) səslər çıxarmaq. Yəni, nalə çəkmək və mahnı oxumaq””.

Qulağa dəyən haram səs barədə Allahın Peyğəmbəri (s) buyurub: «İnsanın bədən üzvlərinin hər birinə zinadan bir bəhrə yazılmışdır ki, istər-istəməz ona yetişər. Məsələn, gözün zinası – (naməhrəmə) baxmaq, ayağın zinası – günaha tərəf getmək və qulağın zinası – haram səslər eşitməkdir».

Səsin adi həyatda səviyyəsinə gəldikdə, müqəddəs dinimiz insanın narahat edəcək tərzdə ucadan danışmağını sevmir. Buyurulur:«Yerişini rahat yeri (nə çox tez, nə də çox asta yeri) və (danışanda) səsini ucaltma ki, səslərin ən pisi – uzunqulağın səsidir». ("Loğman", ayə 19)

Nəhayət, səsin batini gözəlliyinə toxunulan hədisdə Allahın Peyğəmbəri (s) buyurub: «Quranı (xoş) səslərinizlə zinətləndirin».

Allahın Peyğəmbərinin (s) «Kim Quranı hamıdan daha gözəl oxuyur?» sualına verdiyi cavabdan: «Onun Quran oxumağını eşidəndə, səsində Allahdan qorxu və qəzəbi görəsən».

 

 

deyerler.org