Fitrə zəkatı nədir və bu il adambaşı neçə Laridən hesablanmalıdir?

08 Aprel 2024 - 17:15

Fitrə zəkatı – Fitr bayramının axşamı, günəş batdığı vaxt həddi-büluğa çatan və ağıllı olub, bihuş, fəqir və başqasının qulu olmayan şəxsə, özü və onun çörək yeyəni sayılan şəxslərin hər biri üçün, bir "SA" – təqribən 3 kiloqram – öz şəhərində normal olan yeməklərdən, məsələn; Buğda, Arpa, Xurma, Kişmiş, Düyü və Qarğıdalı kimi, müstəhəqqə (maddi durumu yaxşı olmayan şəxsə) verməlidir.

Bu il Gürcüstanda adambaşı fitrə zakatının miqdarı 7-10 laridən hesablanmalıdır. Yəni əgər ailədə 4 nəfər varsa və adam başı 7 laridən hesablansa, 28 lari, 10 laridən hesablansa isə, 40 lari fitrə verilməlidir. Bunu da bilmək lazımdır ki, hər kim qeyd olunan məbləğlərdən daha artıq məbləğdə fitrə zəkatı vermək istəsə, adam başı hesablayıb, daha çox miqdarda fitrə zəkatı ödəyə bilər.

Fitrə zəkatı vacib olan əməllərdən biridir və İmam Sadiq (ə) fitrə zəkatı haqqında buyurur: Namazda Peyğəmbərə (s) salavat göndərməklə namaz tamamlandığı kimi, Fitrə zəkatı verməklə də insanın orucu tamamlanar. Ona görə də əgər insan oruc tutsa və bilərəkdən fitrə zəkatını verməsə, həmin orucun o şəxsə heç bir faydası olmaz və o, tutduğu orucdan bəhrə aparmaz.

Uca Yaradan hər kəsin oruc, dua, namaz və digər ibadətlərinizi qəbul eləsin.

Amin!

 

iman.ge