Ramazan ayı və Quranı anlamaq bacarığı

Quranın nuru istəkli ruhları nurlandırır. Ramazan insanların nəfslərini təmizləmələri və ilahi nuru qəbul etməyə hazırlaşdıqları aydır. Ramazan ayı çirkab və çirkinliklərdən təmizlənmə və vəhy iqliminə nəfəs almaq üçün səfər mövsümüdür. Qurani-Kərim nur mənbəyidir və ancaq onu qəbul etməyə hazır olan ruhu işıqlandıra bilər. Bir büllur qab işığı öz mahiyyətinə hopdurub onu hər tərəfə yaya bildiyi kimi, Quranın nuru da insanın qəlbinə nüfuz edir, insanın hər yerinə çatır, varlığını saflaşdırır və Quran nurundan bəhrələnməyə imkan verir. Qurani-Kərimdə qiyamət gününün inkar edilməsinin səbəbləri belə bildirilir: “Lakin onu həddi aşmış günahkardan başqa heç kəs inkar etməz” (Mütəffifin, 12). Quran ayələrinin hekayət sayılmasının səbəbini belə izah edir: “Xeyr! Həqiqət budur ki, onların əməlləri onların qəlblərini örtmüş və qaraltmışdır” (Mütəffifin, 14). Quran ayələrinin ancaq qəlbində davamlı günahların izini daşıyanlara nağıl olduğu bildirilir. Bu ayədə işlənən günahların qəlbi pas qatı kimi örtdüyü və qaraltdığı, bununla da insanın düşüncə və hisslərinə mənfi təsir göstərdiyi, həqiqəti dərk etməsinə mane olduğu bildirilir. Odur ki, bu pası, çirki təmizləyən, ruhu işıqlandıran bir şey olmalıdır. Ramazan ayı insan ruhunun cilalanması, qəlbə günah üzündən çökmüş pasların təmizlənməsi, ruhun nura hazırlanmasıdır. Qurani-Kərim yalnız hazır və iradəli olanlara işıq salır. Çünki o, hidayətin ancaq təqva sahiblərinə aid olduğunu qəbul edir. "Bəqərə" surəsinin 2-ci ayəsi: “Budur kitab; buna heç vaxt şübhə yoxdur. O, təqvalılar (günahdan çəkinənlər) üçün hidayətdir. Həmçinin deyir ki, "onun ayələri zalımların zərərlərini artırmaqla yanaşı, möminlərin qəlblərinə şəfa və rəhmət mənbəyidir" İsra surəsi, ayə 82). Ona görə də Ramazan ayı təmizlənmə ayıdır. Əgər Allah Quranın mübarək Ramazan ayında nazil olduğunu bildirmişdirsə, bunun səbəbi Ramazanın insanların ruhunu Quranın nurunu qəbul etməyə hazırlamasıdır. Başqa sözlə desək, oruc tutmaqla əldə edilən təmizlik Quranın məfhum və təlimlərini dərk etməyə zəmin yaradır.

iqna.ir